काठमाडौं । नेपाल टेलिकमले नेपाल विद्युत् प्राधिकरणको स्मार्ट मिटरमा प्रयोग गर्नका लागि एक लाख ५० हजार थान ई–सिम उपलब्ध गराउने भएको छ । यसका लागि आज दुवै पक्षबीच एक सम्झौतामा हस्ताक्षर भएको छ ।

उक्त सम्झौतापत्रमा नेपाल टेलिकमको तर्फबाट प्रमुख व्यावसायिक अधिकृत संगीता पहाडी र नेपाल विद्युत् प्राधिकरणको तर्फबाट वितरण तथा ग्राहक सेवा निर्देशनालयका निर्देशक अच्युतबाबु घिमिरेले हस्ताक्षर गरेका छन् ।

प्रमुख व्यावसायिक अधिकृत संगीता पहाडीले नेपाल विद्युत् प्राधिकरणसँग व्यावसायिक सहकार्य गर्न पाएकोमा खुसी व्यक्त गर्दै फेरि पनि यस किसिमको सहकार्य जारी रहने बताएकी छन् ।

नेपाल विद्युत् प्राधिकरणका निर्देशक घिमिरेले पहिलेदेखि नै स्मार्ट मिटरमा नेपाल टेलिकमको सिम प्रयोग भइरहेकोमा आगामी दिनमा नयाँ प्रविधियुक्त ई–सिममार्फत सेवा उपलब्ध हुने भएको भन्दै खुसी व्यक्त गरेका छन् ।

नेपाल विद्युत प्राधिकरणले विद्युत महशुलसम्बन्धी जानकारीका लागि स्मार्ट मिटरको प्रयोग गरिरहेको छ । टेलिकमले उपलब्ध गराएको ई–सिमले प्राधिकरणको सिस्टम र स्मार्ट मिटरको बिचमा सञ्चार सुविधा उपलब्ध गराउन सहयोग गर्छ ।

१०० एम्पियरसम्म क्षमता भएका थ्री फेज ग्राहकहरुका लागि ई–सिम प्रयोग गरिने भएको छ । नेपाल टेलिकमले नेपाल विद्युत् प्राधिकरणलाई यस अघि पनि स्मार्ट मिटर प्रयोजनका लागि ५३ हजार थान सिम उपलब्ध गराइसकेको छ ।