काठमाडौं । अमेरिकी अर्बपति उद्यमी एलन मस्कले माइक्रोसफ्टविरुद्ध कानुनी कारबाही गर्ने चेतावनी दिएका छन् । माइक्रोसफ्टले गैरकानुनी रूपमा ट्विटरको डाटा प्रयोग गरी प्रशिक्षण लिएको भन्दै उनले यस्तो धम्की दिएका हुन् ।

ट्विटरको एपीआईका लागि पैसा तिर्नुपर्ने भएको छ । सोही कारण माइक्रोसफ्टको विज्ञापन प्लेटफर्मले ट्विटरमा ‘सपोर्ट’ नदिने घोषणा गरेको थियो । त्यसपछि मस्कले यस्तो चेतावनी दिएका हुन् ।

ओपन एआईले आफ्नो ठूलो भाषा मोडललाई ‘ट्रेन’ गर्नका लागि ट्विटरको डाटा प्रयोग गरेको थियो । तिनै भाषाको मोडल प्रयोग गरिएका च्याटजीपीटी र अरू एआई टुल बनाइरहेको ओपनएआईमा माइक्रोसफ्टले १० अर्ब अमेरिकी डलरभन्दा बढी लगानी गरेको छ ।

मस्कले साँच्चै माइक्रोसफ्टविरुद्ध मुद्दा हाल्छन्/हाल्दैनन् भन्ने निश्चित छैन । यसअघि पनि उनले यस्तै कतिपय विषयमा मुद्दा हालेका छैनन् ।

माइक्रोसफ्टले यस विषयमा कुनै टिप्पणी गरेको छैन । ट्विटरले पनि कुनै जानकारी दिएको छैन । माइक्रोसफ्टको विज्ञापन प्लेटर्फमले यसको सोसल मिडिया म्यानेजमेन्ट टुलबाट अप्रिल २५ तारिखदेखि ट्विटरमा पहुँच पाउन नसकिने जनाएको छ ।

ट्विटरले यो एपीआईका लागि माइक्रोसफ्टजस्ता कम्पनीलाई मासिक ४२ हजार अमेरिकी डलरसम्म तिर्नुपर्ने जानकारी गराएको छ । एपीआई निःशुल्क नपाउने भएपछि माइक्रोसफ्टले पहुँच नदिने घोषणा गरेको देखिन्छ ।