‘दाइ, भष्मे डन (विपीन कार्की) होइन हिरो ?’ 

‘हो ।’  

‘खोइ त ?’ 

‘आज उहाँको सुटिङ छैन रे !’

‘भोलिचाहिँ आउनुहुन्छ ?’

‘अँ, भोलिलाई सिन छ रे !’

‘भोलि पनि यहीँ हुन्छ सुटिङ ?’

‘यहीँ हो ।’

सुटिङ सेटमा पंक्तिकारसँग अर्घाखाँचीका नवीन पाण्डेले गरेको संवाद हो, यो ।

‘भष्मे डन’को फ्यान हो तपाईं ?’

‘हो, दाइ ।’

‘तपाईंचाहिँ को हो ?,’ उनले प्रश्न गरे । 

‘...।’

बेबारिसे लास व्यवस्थापन समितिअगाडिको पूजा पसलमा बुधबार दिउँसो चलचित्र ‘पशुपतिप्रसाद–२: भष्मे डन’को छायांकन भइरहेको थियो । छायांकन हेर्नेको ठूलो भीड थियो ।

भीडमा रहेका अर्का एकजनाले सोधे, ‘कुन फिल्मको सुटिङ हो ?’ 

‘पशुपतिप्रसाद–२: भष्मे डन को ।’

‘भष्मे डन होइन हिरो ?,’ उनको प्रश्न थियो ।

‘हो,’ निर्माण युनिटको कसैले जवाफ दियो । 

‘निर्देशकचाहिँ त्यो ह्याट लगाउने हो ?,’ सिनेमेटोग्राफरतर्फ देखाउँदै उनले सोधे ।

‘होइन ।’ 

‘को हो त ?’

‘दीपेन्द्र के खनाल ।’ 

‘ए, हो त है !’

‘यो सबैको खान्तेपिन्ते उसैले बेहोर्ने होइन ?,’ उनको अर्को जिज्ञासा थियो । 

‘खर्च प्रोडुसरको हुन्छ ।’ 

‘फिल्म बनाउन पनि गाह्रो है,’ उनी बोलिरहेका थिए, ‘यस्तो गरेर त बनाउनुपर्छ ।’

फाइटको सिन छायांकन भइरहेको थियो । सौगात मल्ललगायत कलाकार अभिनय गरिरहेका थिए । दर्शक आउने–जाने क्रम चलिरहेको थियो ।

एकजोडी आएर सोध्यो, ‘पशुपतिप्रसादको छायांकन हो रे हो ?’

‘हो ।’

हिरोइन त आज छैन रै’छ नि ?’ 

‘भष्मे डन होइन हिरो ? मलाई कस्तो मन पर्छ नि !,” केटातिर हेर्दै युवतीले भनिन् । 

‘भष्मे र दयाहाङ मलाई मन पर्छ । आज त सौगातको सुटिङ र’छ । फाइटको सिन र’छ । फाइटमा निखिल उप्रेती खत्रा हो नि है,” युवकतिर हेर्दै उनी बोलिरहेकी थिइन्, ‘त्यो बेला निखिल उप्रेती खुब मन पर्थ्यो । ए साँच्चि, तपाईंले फूलबारी हेर्नुभयो ?” 

युवक ‘अँऽऽऽ अँऽऽऽ’ अनकनाए । 

फेरि युवती बोलिन्, ‘त्यसमा पनि भष्मे डन छ नि !’

‘भोलि पनि यहीँ आउने ल ? अहिले जाऊँ,’ युवतीले भनिन् । उनीहरू भष्मे डनलाई भेट्ने आसमा त्यहाँबाट हिँडे । फर्कँदै उनी भन्दै थिइन्, ‘पछि फिल्म हेर्नुपर्छ है ?’

० ० ० 

सिन नं. ८६ को छायांकन सकियो । मधेसी भेषमा देखिएका सौगात सेटबाट निस्किए । भीडमा एकजनाले उनको बाटो छेकेर भने, ‘सर, एउटा सेल्फी खिचौँ न ।’

‘क्यारेक्टर बाहिरिन्छ भनेर प्रोडक्सनले फोटो खिच्न दिएको छैन,’ सौगातले भने । अधबैँसे ती पुरुषले जिद्दी गरे, ‘केही हुन्न, एउटा फोटो त हो । म गाउँमा तपाईंको फिल्म चलाउने मान्छे । मेरो हल छ ।’

सौगातले सम्झाउँदै भने, ‘मैले हजुरको कुरा बुझेँ । तर प्लिज, फोटो खिच्न प्रोडक्सनले दिँदैन । म उता आउँदा तपाईंलाई भेट्छु । आउनुस्, गला मिलाऊँ ।” सौगातले गला मिलाए । सेक्युरिटीले भीड हटाउँदै सौगातलाई बाहिर निकाल्यो । 

० ० ०

सौगातसँगै साजन मगरलगायत उनको ग्याङको फाइट चलिरहेको थियो । निर्देशक दीपेन्द्र के खनाल फ्रेम नियालिरहेका थिए । छायांकनस्थल पुगेका चलचित्रकर्मी माधव वाग्ले कुर्सीमा बसिरहेका थिए । उनको पछाडि उभिएका एक युवकले छायांकनको भिडियो खिच्न थाले । 

सुटिङ युनिटका एक व्यक्ति कुदेर गएर भने, ‘प्लिज, डिलिट गर्दिनुस् न । फोटो, भिडियो खिच्न पाइँदैन ।”
 
‘तपाईंहरूकै प्रोमोसन हुन्छ त,’ ती युवकले जिरिह गरे । 
 
‘प्रोमोसन होइन नि भाइ ! यो पाइरेसी हो,’ सायद माधव वाग्लेको चित्त दुखेछ, बोले ।

० ० ०

प्रोडक्सन म्यानेजर शंकर पाण्डेलाई भ्याइनभ्याइ थियो । असिनपसिन गर्दै उनी भीड हटाउने प्रयास गरिरहेका थिए । हाते माइक बोकेर उनी भन्दै थिए, ‘फोटो र भिडियो खिच्ने काम कसैले पनि नगरिदिनु होला ।’

भीडले निर्देशक दीपेन्द्र के खनाल हैरान भइसकेका रहेछन् । उनले पंक्तिकारलाई देख्नेबित्तिकै भने, “तनाव छ नरेश तनाव...! भीडले सातो उडाइसक्यो ।”

दीपेन्द्रले गुनासो गरे, “३० दिनको सेड्युल ४० दिनमा पनि नकिने भयो । भीड हटाएर हैरान भइसकियो ।”

‘पशुपतिप्रसाद–२: भष्मे डन’ले ‘सिङ्क साउन्ड’ गरिरहेको छ । यसले पनि थप समस्या सिर्जना गरेको छ । “यता कलाकारले गज्जबको एक्टिङ गरेर टेक ओके हुन्छ । उता भीडबाट को कराउँछ, साउन्डको मान्छे रि–टेक भन्दिछ,” उनले भने ।

निर्देशक दीपेन्द्रलाई असिस्ट गरिरहेका शान्तिम कोइरालाले भने, “हिजो विपीन दाइको छायांकन भइरहेको थियो, पारि भीडबाट दुईपटकसम्म एउटै व्यक्तिले ‘विपीन दाइ, म तपाईंको बिग फ्यान’ भनेर करायो । तीनपटक रि–टेक लिनुपर्‍यो ।” 

० ० ०

भीड व्यवस्थापन गर्न नसकेपछि ग्रुपफोबाट सेक्युरिटी मगाएर निर्माण पक्षले छायांकन गरिरहेको थियो । “भीडले काम गर्नै नदिएपछि आजबाट हामीले सेक्युरिटी झिकाएर काम गरिरहेका छौँ,” दीपेन्द्रले भने, “दिनको दुइटा सिनभन्दा बढी खिच्न सकिएको छैन । यस्तै हो भने कति दिन लाग्ला सिनेमा खिच्न !”

सुरुका दिनमा भीडबाट जोगिएर खिच्न झनै कठिनाइ झेल्नुपरेको उनले सुनाए । तुलनात्मक रूपमा भीड केही कम भएको तर सिङ्क साउन्डका कारण काममा ढिलो भइरहेको उनको भनाइ छ । 

० ० ०

भीडको व्यवस्थापनबाट जोगिएर खिच्नभन्दा पनि रिलिज हुँदासम्म सिनेमाको रहस्य नै नरहला भन्ने दीपेन्द्रमा चिन्ता छ । “जति भने पनि कोही न कोहीले खिचिरहेकै हुन्छ । दुईचारजना भए पो रोकेर सक्नु, सिनेमा खिचेर हैरान भइयो,” उनी भन्छन्, “सिनेमाको रहस्य कसरी बचाउने भन्ने चिन्ता भइसक्यो ।”

सामाजिक सञ्जालले सिनेमाको रहस्य लुकाउन कठिन भइसकेको उनको अनुभव छ । “हिजो म आर्यघाटमा मान्छे जलाएको ठाउँमा थिएँ । आमालाई चितामा राखेको छ । दागबत्ति दिने तयारी भइरहेको छ । छोरो दुई हातमा मोबाइल बोकेर रुँदै दुइटै माबाइलबाट भिडियो खिचिरहेको छ,” सामाजिक सञ्जालप्रति मान्छेको मोह कतिसम्म छ भन्दै दीपेन्द्र भन्छन्, “यस्तो अवस्थामा त भिडियो खिचेर टिकटक र फेसबुकमा हाल्ने हाम्रो समाजले के चाहीँ बाँकी राख्ला भिडियो खिच्न र पोष्ट गर्न ।”

‘पशुपतिप्रसाद–२: भष्मे डन’ दीपेन्द्रको १२औँ सिनेमा हो । तर, उनले छायांकनमा यति धेरै भीड झेल्नुपरेको यो पहिलो अनुभव हो । “यति धेरै भीड मैले कहिल्यै देखेको थिइनँ । पशुपतिप्रसाद छायांकन हुँदा खासै कसैले वास्तै गर्दैन थियो,” उनी भन्छन्, “तर, पशुपतिप्रसाद–२: भष्मे डन भनेपछि जो पनि झुम्मिन्छन् ।” 

० ० ०

लञ्च ब्रेक भयो । सौगात मल्लसँग किचनमा भेट भयो । “तपाईं त यतैबाट सुटिङमा जोइन हुनुभएको होइन ?,” उनले जवाफ दिए, “हो, म यतै थिएँ ।” करिब दुई महिनादेखि क्यारेक्टरको तयारीका लागि सौगात पशुपतिमा थिए ।

“झन्डै दुई महिना म यतै बसेँ । यतै रमाएँ । अस्ति त यहीँ बाबाजीसँग सुतेँ । बिहान उठ्दा ऊ थिएन । म बिहानै उठेर हिँडे भने पनि अबेरसम्म सुते हुन्छ भनेको थियो,” सौगातले भने, “आखिर खुुसी खोज्ने त रहेछ जिन्दगी । म खुसी छु । यहाँ बस्दा म रमाइरहेको छु ।”

केही समयदेखि सोही क्षेत्रमा रहेको र छायांकन पनि त्यहीँ भएकाले आफूले कामको दबाब महसुस नगरेको उनले बताए । 

० ० ०

‘पशुपतिप्रसाद–२: भष्मे डन’मा विपीन कार्की, सौगात मल्ल, स्वस्तिमा खड्का, प्रकाश घिमिरेलगायत कलाकार मुख्य भूमिकामा छन् । आउँदो दसैँमा रिलिज हुने यो चलचित्र खगेन्द्र लामिछानेले लेखेका हुन् ।