काठमाडौं । नेपाल नागरिक उड्डयन प्राधिकरणले आइतबार तीन एटीसीलाई कारबाही गरेको छ । एकै समयमा एकै उचाइमा उडानको अनुमति दिने त्रिभुवन अन्तर्राष्ट्रिय विमानस्थल कार्यालयका तीन एटीसीलाई कारबाही गरिएको हो ।

घटनाका बारेमा छानबिन गर्न भन्दै अर्काे सूचना नआएसम्मका लागि उनीहरूलाई निलम्बन गरिएको छ । प्राधिकरणले उनीहरूको नाम खुलाएको छैन ।

घटनाबारे छानबिन गर्न प्राधिकरणले समिति गठन गरेको छ । छानबिन समितिले रिपोर्ट बुझाएपछि थप कारबाही प्रक्रिया अघि बढाइने प्राधिकरणका सूचना अधिकारी ज्ञानेन्द्र भुलले बताए ।

घटना यस्ता थियो
गएको शुक्रबार सिमराको आकाशमा रहेको गुराँस पोइन्टमा दुई विमान  ‘होल्ड’मा थिए । एयर इन्डिया १९ हजार फिटबाट अवतरण गरिरहेको थियो । गुराँस पोइन्टमा एयर इन्डिया १६ हजार फिटमा होल्ड गर्नुपर्ने थियो । किनभने, सोही समयमा गुराँस पोइन्टमै नेपाल एयरलाइन्सको जहाज १५ हजार फिटको उचाइमा होल्ड गरिरहेको थियो ।

तर, एटीसीको सूचनाबिना एयर इन्डियाको विमान सिधै अवतरण ग¥यो । दुई जहाज एकै ठाउँमा होल्ड गर्दा कम्तीमा हजार मिटर उचाइको दूरी हुनुपर्ने प्रावधान छ ।  

त्यस दिन एयर इन्डियाको विमान १६ हजार मिटरभन्दा तल झरेपछि नेपाल एयरलाइन्सको ट्राफिक कोलिजन एफाडेन्स सिस्टम (टीसीएएस) आयो । त्यसपछि नेपाल एयरलाइन्सलाई १३ हजार ५०० को फिटमा झारिएको थियो । एयर इन्डियाको विमानलाई १५ हजार फिटमा होल्ड गराइएको थियो ।

सूचना अधिकारी भुलका अनुसार हजारभन्दा कम फिटको दूरीलाई ‘सफ्रेसन फ्रिज’ भनिन्छ । यसलाई उड्डन क्षेत्रमा इन्सिडेन्ट (घटना)का रूपमा हेरिन्छ ।