पोखरा । गण्डकीमा सत्ता साझेदार दल नेकपा (माओवादी केन्द्र)ले भोलि शुक्रबार सरकारलाई दिएको समर्थन फिर्ता लिने भएको छ । माओवादी केन्द्रका अध्यक्ष तथा प्रधानमन्त्री पुष्पकमल दाहाल प्रचण्डले नेताहरुलाई गण्डकी प्रदेश सरकारबाट बाहिरिन निर्देशन दिएका छन् ।
अध्यक्षको निर्देशनपछि शुक्रबार बिहान संसदीय दलको बैठक बस्ने र निर्णय गरिने माओवादी केन्द्र गण्डकी प्रदेश संसदीय दलका नेता हरिबहादुर चुमानले बताए । गण्डकीमा उनै चुमानको नेतृत्वमा माओवादी केन्द्र गत पुस २५ गते नेकपा (एमाले) संसदीय दलका नेता खगराज अधिकारी नेतृत्वको सरकारमा सामेल भएको थियो ।
केन्द्रमा पुस १० गते प्रचण्ड एमाले नेतृत्वको गठबन्धनबाट प्रधानमन्त्री बनेका थिए । तर, राष्ट्रपति निर्वाचनसम्म आइपुग्दा सत्ता गठबन्धनमा कांग्रेस प्रवेश ग¥यो, एमाले बाहिरियो । त्यसकै प्रभाव स्वरुप यहाँ माओवादीलाई एमाले सरकारबाट बाहिरिन प्रचण्डले निर्देशन दिएका हुन् ।
“निर्देशन आइसक्यो, अब सरकारमा बसिरहने कुरा भएन, भोलि दलको बैठक बसेर बाहिरिन्छौँ,” चुमानले भने । उनका अनुसार संसदीय दलले मन्त्रीको राजीनामा बुझाउने निर्णय गर्नेछ ।
वर्तमान सरकारमा माओवादीबाट चुमान भौतिक पूर्वाधार विकासमन्त्री र रेशम जुग्जाली उद्योग, पर्यटन, वन तथा वातावरणमन्त्री छन् । २५ गते बिनाविभागीय मन्त्री बनेका चुमान र माघ १० गते मन्त्री बनेका जुग्जालीले एकैदिन मन्त्रालयको जिम्मेवारी पाएका थिए ।
माओवादीले सरकार छोड्नासाथ मुख्यमन्त्री खगराज अधिकारी स्वतः अल्पमतमा पर्नेछन् । संविधानअनुसार उनले ३० दिनभित्र विश्वासको मत लिनुपर्ने हुन्छ ।
यता, नयाँ सत्ता गठबन्धनबाट गण्डकीको मुख्यमन्त्रीमा कांग्रेस संसदीय दलका नेता सुरेन्द्रराज पाण्डेले दाबी गरिरहेका छन् । राजधानीमा रहेक उनी भोलि नै पोखरा आउने र माओवादीसँग मन्त्रालयको भागबण्डाको बारेमा छलफल गर्ने स्रोतले जनायो ।
