काठमाडौं । खाना पकाउने एलपी ग्यास अति प्रज्वलनशील पदार्थ हो । यसको गन्धले ग्यास ‘लिक’ भएको संकेत दिन्छ ।
ग्यासको प्रयोग गर्दा उच्च सावधानी अपनाउनुपर्छ । यदि, ग्यास लिक भएमा पहिले रेगुलेटर र चुलोको नब बन्द गर्नुपर्छ ।
यस्तै, झिल्का आउने वस्तु जस्तै : बिजुलीका उपकरण, स्वीच आदि कुनै हालतमा चलाउन नहुने नेपाल ग्यासले जनाएको छ ।
ग्यास लिक भएमा रेगुलेटर छुटाएर सिलिन्डरको भल्बमा सेफ्टी क्याप लगाई सिलिन्डर खुला ठाउँमा राख्नुपर्नेलगायत सावधानी अपनाउनुपर्ने नेपाल ग्यासले जनाएको छ ।
ग्यास लिक भएमा यी कुरामा ध्यान दिनोस्–
१. पहिले रेगुलेटर र चुलोको नब बन्द गर्नुहोस् ।
२. आगोको स्रोतहरू जस्तै : मैनबत्ती, दियो, धूप, सलाई आदि नबाल्नुहोस्, निभाउनुहोस् ।
३. झिल्का आउने वस्तु जस्तै : बिजुलीका उपकरणहरू, स्वीच आदि कुनै हालतमा पनि नचलाउनुहोस् ।
४. झ्याल र ढोका खुला राख्नुहोस् ।
५. रेगुलेटर छुटाएर सिलिन्डरको भल्बमा सेफ्टी क्याप लगाई सिलिन्डर खुला ठाउँमा राख्नुहोस् ।
६. तुरुन्त आफ्नो नजिकको ग्यास विक्रेता वा प्लान्टमा सम्पर्क गर्नुहोस् ।
(नेपाल ग्यासद्वारा जारी सेफ्टी टिप्स)
