काठमाडौं । नेकपा (एमाले)का उपाध्यक्ष विष्णु पौडेलले प्रधानमन्त्री पुष्पकमल दाहाल ‘प्रचण्ड’को प्रश्नको जवाफ दिएका छन् ।

सोमबारको प्रतिनिधिसभा बैठकमा प्रधानमन्त्री प्रचण्डले राष्ट्रपतिमा राष्ट्रिय सहमतिको प्रस्ताव गर्दा एमालेले सरकार किन छाड्यो भन्ने जवाफ दिनुपर्ने बताएका थिए । पौडेलले एमालेले सरकार किन छाडेको भन्ने जवाफ सबैभन्दा धेरै प्रधानमन्त्रीलाई थाहा भएको बताए ।

“नेकपा (एमाले)ले किन समर्थन फिर्ता लियो भन्ने कुरा दुनियाँलाई थाहा छ । सबैभन्दा बढ्ता जानकारी स्वयं प्रधानमन्त्रीजीलाई थाहा छ । त्यसैले उहाँले आफ्नो मनलाई सोधे हुन्छ, नेकपा (एमाले)ले किन समर्थन फिर्ता लियो भन्ने कुरा,” पौडेलले भने, “नेपालको इतिहासमा पराष्ट्रमन्त्रीप्रति जुन व्यवहार भएको छ, कल्पनातित थिएन । त्यो राष्ट्रको विषय थिएन । त्यसले राष्ट्रको हुर्मत लिने काम भएको छ ।”

पौडेलले प्रधानमन्त्रीले नै एमालेले सरकार छाडेर गए हुन्थ्यो भन्ने अभिव्यक्तिपछि सरकार छाडिएको बताए ।

प्रधानमन्त्रीलाई नै थाहा भएको प्रश्न देशवासी र सदनसँग सोधिरहनुपर्छ भन्ने आफूलाई नलागेको पौडेलको भनाइ थियो ।