चितवनका किसानहरूले तरकारीको उचित मूल्य नपाएपछि राज्यको ध्यानाकर्षण गर्न शुकवार सडकमा तरकारी फालेका छन् । किसानहरूले सडकमा तरकारी फाल्नुपर्ने अवस्थाको सम्बोधन गर्न प्रधानमन्त्री पुष्पकमल दाहालले कृषि, पशुपन्छीमन्त्री ज्वालाकुमारी साहलाई निर्देशन दिए ।
किसानले तरकारीको मूल्य नपाएको भन्दै सडकमा फाल्नु पर्ने अवस्था आउन नदिने काम भने कृषि तथा पशुपन्छीमन्त्रीकै हो । मन्त्री साह भने उनको मन्त्रालयसँग सरोकारै नभएको र वैधानिकता नै नभएको ‘जग्गाको निस्सा’ वितरण गर्ने काममा व्यस्त थिइन् ।
बाराको टागियाबस्तीका बासिन्दालाई मन्त्री साहले केही दिन पहिले ‘जग्गाको निस्सा’ वितरण गरेकी थिइन् । सरकारकै अर्को निकाय राष्ट्रिय भूमि आयोगले मन्त्री साहले ‘जनताको आँखामा छारो’ हाल्न ‘जग्गाको निस्सा’ बाँडेको आरोप लगाएको छ ।
यसैगरी वन क्षेत्रको जग्गा वितरण गरी कथित निस्सा दिएकोमा डिभिजन वन कार्यालय वाराले पनि असन्तुष्टि प्रकट गरेको छ । अर्थात्, मन्त्री साहले जनतालाई झुक्याउनेमात्र होइन गैरकानुनी काम पनि गरिछन् ।
जनतालाई जग्गा दिने भन्दै धेरैले धेरैपटक झुक्याई सकेका छन् । टाँगियाबस्तीका बासिन्दालाई एकपटक फेरि झुक्याउने काम मन्त्री साहले गरिन् । यसरी जनतालाई ढाँट्ने काम नैतिकरूपमा त अपराधै हो ।
तरकारी किसानहरूको मर्काको सम्बोधन भने कृषि तथा पशुपन्छीमन्त्रीले नै गर्नुपर्ने काम हो । तर, उनलाई त्यही काम गर्न भने प्रधानमन्त्रीले निर्देशन दिनुपर्यो । यसबाट स्पष्ट हुन्छ - मन्त्रीहरूलाई आफ्नो कामको खासै जानकारी र रूचि छैन ।
जनतालाई लाभ हुने ठोस काम गर्न होइन मन्त्रीहरूको चासो केही गरेको देखाउनमात्रै हुनेरहेछ । सडकका खाल्टाखुल्टी पुर्नेदेखि सबैतिर नयाँ मन्त्रीहरूले चटक त देखाए तर ठोस काम भने केही भएन ।
जनता सधैँ चटकमा रमाउँदैनन् । मन्त्रीहरूले चटक देखाउनुभन्दा जनताका समस्या समाधानमै ध्यान नदिने हो भने जनताको धैर्य समाप्त हुनसक्छ । राजनीतिप्रति बढ्दो वितृष्णा कम गर्न विशेष प्रयास नगर्ने हो भने मुलुक अर्को सङ्कटको भुमरीमा पर्न सक्छ ।
