काठमाडौं । प्रहरीले सामाजिक सञ्जालको दुरुपयोग गरी एक महिलाको चरित्रहत्या गरेको आरोपमा एकजनालाई पक्राउ गरेको छ ।

पीडित महिलाका साथीहरूलाई उनीसँगको अश्लील भिडियो पठाएर चरित्र हत्या गरेको आरोपमा प्रहरीले दोलखाको मेलुङ गाउँपालिका–७ खड्काथोकका २४ वर्षीय अर्जुन खड्कालाई पक्राउ गरेको हो । 

प्रहरीको साइबर ब्युरोका अनुसार उनीहरूबीच फेसबुकबाट भएको चिनजान प्रेम सम्बन्धमा परिणत भएको थियो ।

प्रेम सम्बन्धमा रहँदा उनीहरूबीच शारीरिक सम्बन्ध भएको र त्यतिबेला खिचेका अश्लील फोटो तथा भिडियोहरू खड्काले पीडितको साथीको फेसबुक म्यासेन्जरमा पठाएको प्रहरीले जनाएको छ ।

उनीबारे प्रहरीले अदालतबाट सात दिनको म्याद लिएर अनुसन्धान थालेको जनाएको छ ।