काठमाडौं । नेपाल क्रिकेट संघ (क्यान)को आयोजनामा भएको नेपाल टी–२० लिगमा ‘स्पट फिक्सिङ’मा जोडिएका खेलाडीलगायतलाई पक्राउको तयारी भएको छ ।

नेपाल प्रहरीको केन्द्रीय अनुसन्धान ब्यूरो (सीआईबी)ले अनुसन्धानका क्रममा ‘स्पट फिक्सिङ’को प्रमाण फेला पारेको दाबी गर्दै उनीहरुलाई पक्राउको तयारी गरिएको उच्च स्रोतले जानकारी दिएको छ ।

सीआईबीले अनुुसन्धान अन्तिम चरणमा पुर्‍याएको छ भने केही दिनमै मुद्दा बुझाउने तयारी गरेको छ । बाह्रखरीलाई प्राप्त जानकारीअनुसार नेपाली खेलाडीसहित पाँचदेखि सात जनालाई प्रतिवादी बनाउने तयारी छ ।

विदेशी खेलाडी स्वदेश फर्किइसकेकाले नेपालमा रहेकालाई पक्राउ गरेर मुद्दा बुझाइने सीआईबी स्रोतले बतायो ।

स्रोतका अनुसार ‘स्पट फिक्सिङ’मा एकजना राष्ट्रिय टोलीबाट खेलिसकेका खेलाडीलाई पनि प्रतिवादी बनाउने तयारी छ ।

तर नाम भने उल्लेख गर्न मानेनन् । 

उनले लिगको एक खेलमा बलिङ गर्ने क्रममा ‘स्पट फिक्सिङ’गरेको खुलेको छ । उनले कुन खेलमा ‘स्पट फिक्सिङ’गरेका हुन् भन्नेबारे अनुसन्धानमा सक्रिय ती प्रहरी अधिकारीले बताउन चाहेनन् ।

ती खेलाडीलाई नेपाली टोलीका उदाउँदा युवा खेलाडीको रुपमा हेरिएको प्रहरी दाबी छ । यसबाहेक एकजना पूर्व राष्ट्रिय खेलाडीलाई पनि प्रतिवादी बनाउने तयारी छ ।

‘स्पट फिक्सिङ’मा जोडिएका विदेशी खेलाडीमा वेष्ट इन्डिजका खेलाडी रहेको बताइएको छ । क्यानले व्यावसायिक तथा रणनीतिक साझेदार बनाएको सेभेन थ्री स्पोर्ट कम्पनीलाई पनि प्रतिवादी बनाउने तयारी छ ।

गृह मन्त्रालयले ‘फिक्सिङ’ र ‘स्पट फिक्सिङ’को अनुसन्धान गर्न निर्देशन दिएपछि सीआईबी सक्रिय भएको थियो ।

सुरुमा कमेन्ट्री टिममा रहेका सचिन तिमल्सिनाले सामाजिक सञ्जालमा एक भिडियो सेयर गर्दै लिगमा ‘स्पट फिक्सिङ’को आशंका गर्दै प्रतियोगिताबाट बाहिरिने घोषणा गरेका थिए ।

त्यसपछि काठमाडौं नाइट्सका कप्तान ज्ञानेन्द्र मल्लले आफ्नो टिमका एक सदस्यलाई फिक्सिङको प्रस्ताव आएको खुलासा गरे । तर, उनले कोमार्फत् कसलाई प्रस्ताव आएको भन्ने खुलाएनन् ।

त्यसपछि सीआईबी, राष्ट्रिय खेलकुद परिषद् (राखेप), विश्व क्रिकेटको सर्वोच्च संस्था आईसीसीलगायत निकायले अनुसन्धान सुरु गरेका थिए ।

१० लाखसम्म भएको थियो प्रस्ताव
सीआईबीका अधिकारीहरूका अनुसार बढीमा १० लाखसम्मको प्रस्ताव ‘स्पट फिक्सिङ’को प्रस्ताव आएको खुलेको छ । 

‘स्पट फिक्सिङ’ मा थ्री स्पोर्ट कम्पनीसँग जोडिएका व्यक्ति नै संलग्न रहेको पाइएको छ ।

केही खेलाडीले ‘स्पट फिक्सिङ’को प्रस्ताव आउँदा क्यानलाई जानकारी गराएको खुलेको छ भने केहीले जानकारी नदिएको थाहा भएको छ ।

त्यस्तो प्रस्ताव आउँदा पनि सम्बन्धित निकायलाई जानकारी नगराउने खेलाडीलाई पनि अनुसन्धानको दायरामा ल्याइएको छ ।

गत पुस ९ देखि सुरु भएको प्रतियोगिताको फाइनल खेल पुस २७ मा भएको थियो । 

खेल अवधिमै खेलाडीलाई नियन्त्रणमा लिँदा प्रतियोगितामा असर पर्ने भएकाले तत्काल कसैलाई पक्राउ गरिएको थिएन ।

स्रोतका अनुसार ‘स्पट फिक्सिङ’मा कुनै न कुनै रुपमा सुदूरपश्चिम र पोखराबाहेक सबै टोली जोडिएको पाइएको छ ।