धनगढी । कैलालीको धनगढीबाट एकहजारका १४२ थान नक्कली नोट र बाघको हड्डीसहित पाँचजना पक्राउ परेका छन् । धनगढी–१३ स्थित राजपुरको एसएस होटलबाट तीनजनासहित पाँचजनालाई प्रहरीले पक्राउ गरेको हो ।

उनीहरूको साथबाट प्रहरीले एक लाख ४२ हजार नक्कली नोट, पाँच किलो ५३० ग्राम बाघको हड्डीहरू बरामद गरेको छ । 

पक्राउ पर्नेमा होटलमा कोठा लगेर बसेका दार्चुलाको लेकम गाउँपालिका ६ का ३३ वर्षीय लिलाधार मिश्र, डोटीको शिखर नगरपालिका– १० का ३० वर्षीय करन सिंह धामी र डोटीकै बडिकेदार गाउँपालिका १ का ५० वर्षीय मोहन सिंह बोहरा रहेका छन् । 

उनीहरूमाथि अनुसन्धान गर्दै जादाँ धनगढीमै कोठा भाडामा लिएर बस्ने डोटीको शिखर नगरपालिका १० का १९ वर्षीय टेकेन्द्र धामीलाई पनि प्रहरीले पक्राउ गरेको हो । 

प्रहरीले यसअघि पुस ९ गते धनगढी उपमहानगरपालिका ४ बसपार्क स्थित साल्ट ट्रेडिङ कर्पोरेसन अगाडि नक्कली मुद्राको कारोबार गरिरहेको अवस्थामा कैलालीको चुरे गाउँपालिका ६ का ५५ वर्षीय लालबहादुर साउँदलाई पक्राउ गरेको थियो । 

साउँदमाथि खानतलासी गर्ने क्रममा प्रहरीले एक हजार दरका चार थान नक्कली नोट फेला पारेको थियो । उनीसँग जोडिएकाहरूको खोजी गर्ने क्रममा प्रहरीले थप चारजनालाई पक्राउ गरेको जिल्ला प्रहरी कार्यालयका प्रहरी प्रवक्ता प्रहरी नायव उपरिक्षक वेदप्रकाश जोशीले जानकारी दिए ।

पक्राउ परेका सबैलाई जिल्ला प्रहरी कार्यालय कैलालीमा राखिएको छ ।