धनगढी । आरजे २७ पीए ५७०३ नम्बरको बस दिउँसो १२ बजे भारतको गुजरातबाट पूरै नेपालीहरु भरिभराउ बस आइतबार राति उत्तरप्रदेशको राजधानी लखनउमा दुर्घटना भयो । लखनउ सहरको २० किलोमिटर नेपालतर्फ आइतबार राति करिब पौने तीन बजे दुर्घटना भयो । त्यहाँ चालक भारतीय नागरिकसहित कैलालीका तीनजनाले ज्यान गुमाए । अन्य सातजना घाइते भएका छन् । चालकले राति खाना खाने होटलमा रक्सी सेवन गरेका दुर्घटना भएको बसमा सवार दीपेन्द्र साउदले बताएका छन् ।

दुर्घटनमा परेर कैलालीको टीकापुर नगरपालिका–१ बस्ने वर्ष ५५ को चन्द्र साउद, ४५ को ललित साउद, टीकापुर बस्ने वर्ष २० की निर्मला बोहोरा रहेका छन् । घाइते कैलालीको टीकापुरको ३५ वर्षीय हरि साउद गम्भीर रहेको जिल्ला प्रहरी कार्यालयका प्रहरी प्रवक्ता डीएसपी वेदप्रकाश जोशीले जानकारी दिएका छन् । घाइतेहरुको उपचार लखनउको अस्पतालमा उपचार भइरहेको छ । बसमा सवार कोही पनि नेपाल फर्केका छैनन्, डीएसपी जोशीले बताएका छन् ।

प्रत्यक्षदर्शी बसमा सवार कैलालीका दीपेन्द्र साउदको बयान

मेरो घर कैलालीको टीकापुर हो । हाम्रो बसको अन्तिम गन्तव्य नेपालको सिमानाको बजार उत्तरप्रदेशको खिरी जिल्लाको पलिया थियो । रातिको पौने तीन बजे खाना खुवायो । खाना खाएर हिँड्यो । होटलमा चालकले रक्सी पिएको रहेछ । केही अगाडि हिँडेपछि गाडी रोकियो । कुहिरोले सडक धपक्कै ढाकिएको थियो । हामीले भनेका पनि थियौँ, चलाउन सकिँदैन भने रोकौँ । केही तनाव नलिनुहोस्, हामी जसरी पनि गन्तव्य पुर्‍याउँछौँ। हाम्रो दैनिकको काम हो गाडी चलाउने चालकले भनेको थियो । तपाईँ जाने भए बस्नुस्, होइन भने हामी हिँड्छौँ । हामी केही बोल्न सकेनौँ । हिँडेको २० मिनेटपछि गडाम्म आवाज आयो । हामी झस्किँयौँ । आइमाई बच्चा रोइरहेका थिए । हामी कोही झ्यालबाट फुत्केर बच्न सफल भयौँ । मेरै अगाडिबाट एक महिला झ्यालबाट निस्केको देखेँ । तर, पछाडिको गाडीले ठक्कर दियो । पछि एकजना दाताले चियासहित र नास्ता खुवाएर एम्बुलेन्समार्फत नजिकैको अस्पताल पुर्‍याउन पहल गरेको थियो ।