डडेलधुरा । देश संघीय व्यवस्थापमा जानुअघि नौ जिल्ला रहेको तत्कालीन सुदूरपश्चिम विकास क्षेत्र र पूर्वी नेपालका कुनै एक जिल्लाको बजेट बराबर हुन्थ्यो । ८/९ वर्ष अगाडि पनि सुदूरपश्चिमको भन्दा बढी बजेट मोरङ जिल्लाको थियो । राज्यको विभेदविरुद्व सुदूरपश्चिमले पटकपटक संघर्ष गर्नुपर्‍यो । अहिले आएर अन्य प्रदेशकै तुलनामा सुदूरपश्चिमले पनि बजेट पाइरहेको छ ।

तर, ०७९ मंसिर ४ को निर्वाचनपछि राष्ट्रिय दल बनेका सबै पार्टीले पुरानो बजेटकै जसरी सुदूरपश्चिमलाई विभेद गरेका छन् । शनिबार समानुपातिक निर्वाचन प्रणालीबाट सिट प्राप्त गरेका दलहरूले बुझाएको सांसदहरूको नामावली त्यस्तो देखिएको छ । प्रतिनिधिसभामा समानुपातिकतर्फका ११० मध्ये सुदूरपश्चिमबाट चारजना मात्रै परेका छन् । थ्रेसहोल्ड कटाएका सातमध्ये चार पार्टीले त सुदूरपश्चिमबाट एकजनाको नाम पनि निर्वाचन आयोगमा बुझाएका छैनन् ।

नेपाली कांग्रेसबाट कैलालीकी ईश्वरी न्यौपाने र प्रधानमन्त्री शेरबहादुर देउवापत्नी आरजु रााण देउवाको नाम मात्रै निर्वाचन आयोगमा पुगेको छ । नेकपा (एमाले) प्रदेश सचिव धर्मराज पाठकका अनुसार सुदूरपश्चिमबाट एमालेले एकजनाको नाम मात्रै आयोगलाई बुझाएको छ । बाजुराका दयालबहादुर शाहीलाई समानुपातिकतर्फ सांसद बनाउन आयोगलाई नाम पठाइएको सचिव पाठकले बताए । नेकपा (माओवादी केन्द्र)ले पनि सुदूरपश्चिमका नौ जिल्लामध्ये कैलालीकी रुपा चौधरीलाई समानुपातिकमा समेटेको छ । 

कूल ११० मध्ये एमालेले ३४, नेपाली कांग्रेसले ३२, माओवादी केन्द्रले १४, राष्ट्रिय स्वतन्त्र पार्टीले १३, जनता समाजवादी पार्टीले पाँच, राष्ट्रिय प्रजातन्त्र पार्टीले सात र जनमत पार्टीले पाँचजना समानुपातिक सांसद पाएका थिए ।

समानुपातिकतर्फ न्यून प्रतिनिधित्व देखिएसँगै राष्ट्रिय पार्टीले अहिले पनि सुदूरपश्चिमलाई हेर्ने दृष्टिकोण परिवर्तन नभएको भन्दै विरोध हुन थालेको छ । 

एमाले अध्यक्ष केपी शर्मा ओलीले आफ्नो चुनावी अभियान सुदूरपश्चिमबाट सुरु गर्दै सुदूर र कर्णालीको विकास गर्ने जिम्मा अब एमालेको हो भन्दै भाषण गरेका थिए । तर, समानुपातिकमा पाएका ३४ सांसदमध्ये नौ जिल्ला रहेको सुदूरपश्चिमबाट एमालेले एकजनामात्र छनोट गरेपछि एमालेकै कार्यकर्ता रुष्ट भएका छन् । 

“०७४ सालमा एमालेले समानुपातिकतर्फ ४१ सिट पाउँदा सुदूरपश्चिमबाट पाँचजना परेका थिए,” अनेरास्ववियुकी नेतृ रक्षा बमले सामाजिक सञ्जालमा लेखेकी छन्, “अहिले ३४ पाउँदा एकजना मात्रै परेका छन् । झापाकालाई हाल्न नमिलेर मात्र होला सायद एकजना पनि परेका ।”

प्रतिनिधिसभातर्फ १६ निर्वाचन क्षेत्र रहेको सुदूरपश्चिममा आठमा कांग्रेस, तीनमा नागरिक उन्मुक्ति पार्टी, तीनमा एकीकृत समाजवादी र दुई क्षेत्रमा एमालेका उमेदवार विजयी भएका थिए ।