धनगढी । धनगढीमा बिहीबार ग्रेडरले किचेर मृत्यु भएकी बालिका चेतना साउँदको शव उनका आफन्तले बुझेका छन् । आज चेतनाका आफन्त र प्रशासनबीच सहमतिपछि उनीहरूले शव बुझेको जिल्ला प्रशासन कार्यालय कैलालीका सूचना अधिकारी शिवराज जोशीले जानकारी दिए ।

आजै शवको पोस्टमार्टम गरेर दाहसंस्कार गरिने तयारी गरिएको छ । 

प्रहरीका अनुसार ग्रेडर चालकमाथि मुद्दा दर्ता गर्ने सहमति भएको छ । जिल्ला प्रहरी कार्यालय कैलालीका प्रवक्ता एवम प्रहरी नायव उपरीक्षक वेदप्रकाश जोशीका अनुसार चालकमाथि सवारी ज्यान सम्बन्धी मुद्दा दर्ता गरिएको र चारदिन म्याद थप गरेर घटनाको अनुसन्धान अगाडि बढाउने सहमति भएको छ । 

धनगढीको पञ्चोदय माध्यमिक विद्यालयको कक्षा ८ मा अध्ययनरत चेतनाको ग्रेडरले किचेर मृत्यु भएपछि विद्यार्थीहरू आन्दोलित भएका थिए । निषेधाज्ञाबीच प्रदर्शनले उग्र रूप लिएपछि आज प्रहरीले ३७ सेल अश्रुग्याँस प्रहार गरेको थियो भने २१ जनालाई नियन्त्रणमा लिएको थियो ।

हसनपुर पिपलचौतारा नजिक पानी पिच गरिरहेको ना १ क ९७५ नम्बरको कालिका कन्स्ट्रक्सनको ग्रेडरले लेबल मिलाउँदै ब्याक गर्ने क्रममा कुल्चिएर चेतनाको मृत्यु भएको थियो । ग्रेडर र चालक जिल्ला चितवन भरतपुर महानगरपालिका २८ का २७ वर्षीय विमल कुमाललाई प्रहरीले नियन्त्रणमा लिएको छ ।