बुटवल । १२ जिल्लामा २६ प्रतिनिधिसभा निर्वाचन क्षेत्र रहेको लुम्बिनी प्रदेशमा आम निर्वाचन २०७९ को प्रत्यक्षतर्फको अन्तिम मतपरिणाम सबै क्षेत्रमा आइसकेको छ । 

यहाँ नेकपा (एमाले)ले ठूलो दलको रूपमा आफ्नो स्थान बनाएको छ । निर्वाचन आयोगका अनुसार २६ मध्ये ११ निर्वाचन क्षेत्रमा एमालेका उमेदवार विजयी भएका छन् । 

एमालेपछि सबैभन्दा बढी नेपाली कांग्रेसले ६ स्थानमा जित हासिल गरेको छ भने नेकपा (माओवादी केन्द्र) र राप्रपाले ३/३ स्थानमा जित निकालेका छन् । यस्तै, लोकतान्त्रिक समाजवादी पार्टी (लोसपा) र नेकपा (एकीकृत समाजवादी)ले १/१ सिट जितेका छन् । एक स्थानमा स्वतन्त्र उमेदवार विजयी भएका छन् । 

एमालेबाट चुनाव जित्नेहरु

रुपन्देही २ बाट एमाले उपाध्यक्ष विष्णु पौडेल विजयी भएका छन् । चौथोपटक रुपन्देही २ बाट र समग्रमा पाँचौँपटक सांसद बनेका उनले राष्ट्रिय स्वतन्त्र पार्टीका गणेश पौडेललाई पराजित गरेका हुन् । विष्णु पौडेलको २७ हजार १६५ मत आउँदा गणेश पौडेलको २५ हजार ९९५ मत आएको थियो । 

यस्तै, एमाले सचिव टोपबहादुर रायमाझीले अर्घाखाँचीबाट जित निकालेका छन् । एउटा मात्रै निर्वाचन क्षेत्र रहेको अर्घाखाँचीमा रायमाझीले ४२ हजार ६७५ मत ल्याउन सफल भए । उनले कांग्रेसकी पुष्पा भुसाल (गौतम)लाई पराजित गरे । भुसालले ४० हजार ९४५ मत ल्याएकी थिइन् । पूर्वमन्त्रीसमेत रहेको रायमाझीले चौथोपटक अर्घाखाँचीबाट निर्वाचन जितेका हुन् ।

यस्तै, रुपन्देही १ मा एमालेका छविलाल विश्वकर्मा विजयी भएका छन् । विश्वकर्माले एमाले छाडेर स्वतन्त्र उमेदवारी दिएका घनश्याम भुसाललाई पराजित गर्न सफल भएका हुन् । विश्वकर्माको २४ हजार ८८२ मत थियो भने भुसालको २१ हजार ३१८ मत आएको थियो । उनी अघिल्लोपटक पनि सोही क्षेत्रबाट विजयी भएका थिए ।

गुल्मी क्षेत्र नम्बर २ मा एमालेका गोकर्णराज विष्ट निर्वाचित भएका छन् । पूर्वमन्त्रीसमेत रहेका विष्टले एकीकृत समाजवादीकी रामकुमारी झाँक्रीलाई पराजित गरेका हुन् । विष्टको २८ हजार ४७६ मत आएको थियो भने झाँक्रीको २६ हजार ४४१ मत आएको थियो । 

रुपन्देही क्षेत्र नम्बर ५ बाट एमालेका वासुदेव घिमिरे विजयी भएका छन् । उनले कांग्रेसका भरत शाहलाई पराजित गरे । स्थानीय तहमा राम्रो काम गरेको नजिर बनाएका ५४ वर्षीय घिमिरेले ३६ हजार ८२२ मत ल्याएका थिए भने शाहले २७ हजार १२० मत ल्याएका थिए । 

पाल्पा क्षेत्र नम्बर १ मा एमालेका नारायणप्रसाद आचार्यले ११ हजार मतान्तरसहित जित हासिल गरे । आचार्यको ३१ हजार १०३ मत थियो भने कांग्रेसका ज्ञानबहादुर गाहाको २० हजार २५६ मत आएको थियो । 

पाल्पा क्षेत्र नम्बर २ मा एमालेका ठाकुरप्रसाद गैरे निर्वाचित भए । गैरेले २८ हजार ६४५ मत ल्याएका थिए भने एकीकृत समाजवादीका सोमप्रसाद पाण्डेयले २४ हजार ८९९ मत ल्याएका थिए । 

कपिलवस्तु क्षेत्र नम्बर १ मा एमालेका बलराम अधिकारी विजयी भए । अधिकारीले ३४ हजार ६७५ मत पाउँदा माओवादी केन्द्रका सचिव चक्रपाणि खनाल बलदेवले १८ हजार ९८३ मत ल्याए । जिल्लास्तरमा चर्चा कमाएका अधिकारी विषयगत समितिमा सहभागिता जनाउन सक्नेछन् । 

कपिलवस्तु क्षेत्र नम्बर ३ बाट नेकपा (एमाले)का मंगलप्रसाद गुप्ता विजयी भएका छन् । एमाले अध्यक्ष केपी शर्मा ओलीले पार्टी प्रवेश गराएका गुप्ताले नेपाली कांग्रेसका अभिषेकप्रताप शाहलाई पराजित गरेका हुन् । गुप्ताले २२ हजार ६१९ मत ल्याएका थिए भने शाहले १८ हजार ९८३ मत ल्याएका थिए ।

प्युठानबाट एमालेका सूर्यबहादुर थापा विजयी भए । तत्कालीन प्रधानमन्त्री एवं एमाले अध्यक्ष केपी शर्मा ओलीका प्रेस सल्लाहकारसमेत रहेका क्षेत्रीले राष्ट्रिय जनमोर्चाको किल्लाको रूपमा रहेको क्षेत्रमा सोही पार्टीकी उपाध्यक्ष दुर्गा पौडेललाई पराजित गरे । थापाले ४१ हजार ११८ मत ल्याएका थिए भने पौडेलले ३५ हजार ८१४ मत ल्याएकी थिइन् । 

बाँके १ मा एमालेका सूर्यप्रसाद ढकाल विजयी भएका छन् । ढकालले २५ हजार २६ मत ल्याएका थिए भने माओवादी केन्द्रका महेश्वरजंग गहतराज (अथक)ले १९ हजार ६३२ मत पाएका थिए ।

कांग्रेसका विजेताहरु

बाँके क्षेत्र नम्बर ३ मा कांग्रेसका सहमहामन्त्री किशोरसिंह राठोर विजयी भए । राठोरले २९ हजार ९७ मत ल्याउँदा एमालेका किस्मतकुमार कक्षपतिले २४  हजार ३०५ मत ल्याएका थिए । 

गुल्मी क्षेत्र नम्बर १ मा नेपाली कांग्रेसका डा.चन्द्रकान्त भण्डारी करिब एक हजार ६०० विजयी भएका छन् । भण्डारीको ३३ हजार ७४४ मत ल्याउँदा एमालेका उपमहासचिव प्रदीप ज्ञवालीले ३२ हजार १५१ मत ल्याए । 

कपिलवस्तु क्षेत्र नम्बर २ मा कांग्रेस लुम्बिनी प्रदेश महामन्त्री सुरेन्द्रराज आचार्य विजयी भए । का छन् । आचार्यले ३९ हजार १४ मत ल्याउँदा एमालेका बृजेशकुमार गुप्ताले ३८ हजार ६९७ मत ल्याए । 

दाङ क्षेत्र नम्बर ३ मा कांग्रेसका दीपक गिरी विजयी बने । गिरीले ३६ हजार ९११ मत ल्याउँदा एमालेकी कोमल वलीले २९ हजार ९२ मत पाइन् । 

बर्दिया १ मा कांग्रेसका सञ्जयकुमार गौतम विजयी भए । गौतमले ३० हजार ६११ मत ल्याएका थिए एमालेका लक्ष्मणराज ज्ञवालीले २६ हजार १५५ मत ल्याएका थिए । 

नवलपरासी (बर्दघाट सुस्ता पश्चिम)मा नेपाली कांग्रेसका विनोदकुमार चौधरी विजयी भए । नेपालका एकमात्र डलर अर्बपति चौधरीले २९ हजार ५१९ मत  ल्याएर विजयी हुँदा उनका प्रतिस्पर्धी जनता प्रगतिशील पार्टी नेपालका हृदयेश त्रिपाठीले २२ हजार ३२८ मत पाए ।

माओवादी केन्द्रबाट विजयीहरु

दाङ क्षेत्र नम्बर २ मा माओवादी केन्द्रकी रेखा शर्मा एमाले महासचिव शंकर पोखरेललाई हराउँदै विजयी भइन् । शर्माले २६ हजार ८८० मत ल्याउँदा एमालेका पोखरेलको २६ हजार ६८७ मत आएको थियो ।

रोल्पाबाट माओवादी केन्द्रका उपमहासचिव वर्षमान पुन विजयी भए । पुनले ४१ हजार ७१४ मत ल्याए भने एमालेका पूर्ण मगरले १६ हजार ४८५ मत पाए ।

रुकुम पूर्वमा पनि माओवादी केन्द्रका पूर्णबहादुर घर्तीमगर विजयी भए । लुम्बिनीका निवर्तमान सभामुख घर्तीले १२ हजार २६२ मत ल्याउँदा एमालेका कैलाश कुमार मल्लको पाँच हजार २११ मत आयो ।

राप्रपाबाट विजयीहरु

रुपन्देही क्षेत्र नम्बर ३ मा गृहमन्त्री बालकृष्ण खाँणलाई हराउँदै राप्रपाका दीपक बोहरा विजयी भए । बोहराले ३६ हजार ७१७ मत पाउँदा कांग्रेस केन्द्रीय सदस्य खाँणले ३४ हजार ३६ मत ल्याए । 

बाँके क्षेत्र नम्बर २ मा राप्रपाका धवल शमशेर राणा विजयी भएका छन् । राणाको २९ हजार ५७७ मत आउँदा जनता समाजवादी पार्टी नेपालका मोहम्मद इश्तियाक राईको २३ हजार ५२० मत आयो । 

नवलपरासी (बर्दघाट सुस्ता पश्चिम) क्षेत्र नम्बर २ मा राप्रपाका ध्रुवबहादुर प्रधान विजयी भए । एमालेको समर्थन पाएका प्रधानले ३४ हजार ७६४ मत ल्याउँदा कांग्रेसका देवेन्द्रराज कँडेलको १९ हजार ५९४ मत आएको थियो ।

यस्तै, दाङ क्षेत्र नम्बर १ मा मेटमणि चौधरी लुम्बिनीमा एकीकृत समाजवादीको तर्फबाट एकल विजेता बने । मेटमणिको २६ हजार ५७६ मत आएको थियो भने उनीसँग चुनाव लडेकी एमालेकी शान्ता चौधरीको २१ हजार ४९३ मत आएको थियो ।

यता, लुम्बिनीमा लोसपाबाट एक्ला विजेता सर्वेन्द्रनाथ शुक्ल रहे । रुपन्देही क्षेत्र नम्बर ४ बाट चुनाव जितेका शुक्लले २८ हजार मत ल्याउँला कांग्रेसका प्रमोद यादवले २२ हजार ७०४ मत ल्याए । 

लुम्बिनीमा यसपटक जित निकाल्ने एकमात्र स्वतन्त्र उमेदवार बर्दिया २ का लालवीर चौधरी बने । चापाकल चिह्नमा चुनाव लडेका ६७ वर्षीय चौधरीले २६ हजार ५२० मत ल्याउँदा उनका निकटतम प्रतिस्पर्धी माओवादी केन्द्रका सुरेश पन्थ २६ हजार ३८४ मत ल्याएका थिए ।