डडेलधुरा । १६ प्रतिनिधिसभा र ३२ प्रदेशसभा निर्वाचन क्षेत्र रहेको सुदूरपश्चिममा बाजुराबाहेक सबै क्षेत्रको अन्तिम परिणाम सार्वजनिक भएको छ ।
प्रतिनिधिसभातर्फ सात क्षेत्रमा नेपाली कांग्रेस, तीनमा नेकपा (एकीकृत समाजवादी), तीनमा नागरिक उन्मुक्ति पार्टी र दुईमा नेकपा (एमाले) विजयी भएको छ ।
प्रदेशसभातर्फ ११ मा कांग्रेस, आठमा नेकपा (माओवादी केन्द), पाँचमा नागरिक उन्मुक्ति, तीनमा एमाले, दुईमा एकीकृत समाजवादी र एक क्षेत्रमा स्वतन्त्र उमेदवार विजयी भएका छन् ।
०७४ सालको निर्वाचनमा प्रत्यक्षतर्फ प्रतिनिधिसभामा १६ मध्ये ११ र प्रदेशमा ३२ मध्ये १७ सिट जितेको एमाले यसपटक भने प्रतिनिधिसभामा दुई र प्रदेशसभामा तीन क्षेत्रमा समेटिएको छ । प्रदेशका आठ जिल्लामध्ये एमाले कैलाली, डडेलधुरा, दार्चुला, बझाङ र अछाम जिल्लामा भने प्रदेश र प्रतिनिधि दुवैतर्फ निल भएको छ ।
एमालेले कञ्चनपुर र बैतडीमा प्रदेश र प्रतिनिधिसभातर्फ १÷१ सिट जितेको छ भने डोटीको एउटा प्रदेशसभा जितेको छ । कञ्चनपुर निर्वाचन क्षेत्र नम्बर १ मा एमालेका तारा लामा तामाङ र बैतडीमा प्रतिनिधिसभातर्फ दामोदर भण्डारी विजयी भएका छन् । कञ्चनपुर १ (१)मा एमालेका वीरबहादुर थापा, डोटी १ (१) मा चक्र मल्ल र बैतडी १ (१) मा सुरेन्द्रबहादुर पाल विजयी भएका छन् ।
प्रधानमान्त्री तथा नेपाली कांग्रेसका सभापति शेरबहादुर देउवाको गृहजिल्ला डडेलधुरामा पनि एमाले निल भएको छ । डडेलधुरामा प्रतिनिधिसभा सदस्यका लागि एमालेबाट चक्र स्नेहीले उमेदवारी दिएका थिए । तर, पार्टी अध्यक्ष केपी शर्मा ओलीले नै उनको उमेदवारी फिर्ता गराउदै बीपी कांग्रेसका कर्णबहादुर मल्ललाई समर्थनको घोषणा गरेका थिए ।
प्रदेशसभा (१) मा पूर्वप्रदेशमन्त्री पठानसिंह बोहरा र (२) मा गजेन्द्र शाहीको एमालेबाट उमेदवारी थियो । तर, बोहरा र शाहीले चुनाव हारेका छन् । ०७४ सालको निर्वाचनमा कांग्रेसका रघुबर भट्टलाई पराजित गर्दै एमालेका बोहरा निर्वाचित भएका थिए ।
दार्चुलामा पनि एमाले ‘क्लिन स्विप’ भएको छ । प्रतिनिधिसभा सदस्य निर्वाचनका लागि एमालेबाट पूर्वमन्त्री गणेशसिंह ठगुन्ना उमेदवार थिए । उनलाई उद्योग मन्त्रीसमेत रहेका कांग्रेस उमेदवार दीलेन्द्रप्रसाद बडूले पराजित गरेका छन् । प्रदेश (१) मा एमालेका हरदेव जोशीलाई पराजित गर्दै कांग्रेसका विक्रम धामी विजयी भए । प्रदेशसभा (२) मा माओवादीका मानबहादुर धामीसँग एमाले उमेदवार रामदत्त जोशी पराजित भएका छन् ।
दुई प्रतिनिधिसभा निर्वाचन क्षेत्र रहेको अछाममा पनि एमाले शून्य भएको छ । प्रतिनिधिसभा क्षेत्र नम्बर १ मा एमालेका झपट बोहरालाई पराजित गर्दै एकीकृत समाजवादीका शेरबहादुर कुँवर विजयी भए । क्षेत्र नम्बर २ मा कांग्रेसका पुष्पबहादुर शाहीसँग एमाले उमेदवार यज्ञबहादुर बोगटी पराजित भएका छन् । प्रदेशतर्फ अछाम १ (१) मा कांग्रेसका मेघराज खड्कासँग एमालेका देवबहादुर कुँवर पराजित भएका छन् भने १ (२) मा एमालेका कृष्णप्रसाद जैशी माओवादीका झपट साउदसँग पराजित भएका छन् ।
बझाङ जिल्लामा पनि एमाले यसपटक निल भएको छ । प्रतिनिधिसभातर्फ एकीकृत समाजवादीका भानुभक्त जोशीले एमाले उमेदवार ऐन महरलाई पराजित गरे । प्रदेश (१) मा कांग्रेसका पृथ्वीबहादुर सिंहले एमाले उमेदवार अफिलाल ओखेडालाई पराजित गरेका छन् । प्रदेश (२) मा माओवादी केन्द्रका भीमबहादुर भण्डारीले एमाले उमेदवार लालबहादुर रावललाई पराजित गरेका छन् ।
पाँच निर्वाचन क्षेत्र रहेको कैलालीमा पनि एमाले प्रदेश र प्रतिनिधिसभातर्फ निल भएको छ । यहाँ प्रतिनिधिसभा सदस्यका तीन सिट नागरिक उन्मुक्ति पार्टीले जितेको छ भने दुई क्षेत्रमा कांग्रेस विजयी भएको छ ।
प्रदेशसभा सदस्यका १० सिटमध्ये पाँच क्षेत्रमा नागरिक उन्मुक्ति, तीन क्षेत्रमा कांग्रेस तथा एक/एक क्षेत्रमा एकीकृत समाजवादी र माओवादी केन्द्रका उमेदवार विजयी भएका छन् । ०७४ को निर्वाचनमा बाम गठबन्धन कैलालीका पाँचमध्ये चार क्षेत्रमा विजयी भएको थियो ।
