डडेलधुरा । डडेलधुरामा अहिले मेला, जात्राको रौनक छ । हरेक दिन कुनै न कुनै स्थानमा मेला भर्नेको घुइँचो हुन्छ ।

अजयमेरु गाउँपालिका–६, कनाकोटस्थित डागेश्वरी मन्दिरमा यही कात्तिक २५ गते मेला लागेको थियो । त्यसको अघिल्लो दिन रतेडी मेला लागेको थियो । २५ गते दिउसेडी मेला लाग्यो ।

डडेलधुराका सात पालिकासँगै छिमेकी जिल्ला बैतडी र भारतको उत्तराखण्डबाट समेत आठ वर्षपछि लागेको मेला भर्न दर्शनार्थी डागेश्वरी मन्दिरमा पुगेका थिए । डागेश्वरी सनातन धर्म सेवा समितिका अध्यक्ष रामदत्त पन्तका अनुसार मेलाका क्रममा विभिन्न टोलबाट निस्केका चौलो पुजारी गाउँ भण्डार घरको खलाबाट भागेश्वरी माताको दरबारमा पुगेका थिए ।

सोही दिन डागेश्वरी मन्दिरनजिकै रहेको गंगेश्वर भन्ने स्थानमा एक युवक काम्न थाले । “स्थानीय केही व्यक्तिले मादकपदार्थ सेवन गरेर काम्न थालेको भन्दै आलोचना गर्न थाले,” कानाकोटका एक स्थानीयले भने, “तर, ती व्यक्ति धामीजस्तै काम्न थालेका थिए ।”

डागेश्वरी सनातन धर्म सेवा समितिका सचिव विष्णुदत्त पन्त भन्छन्, “अबको दुई दिनभित्र दुनियाँलाई थाहा हुने गरी चिना देखाउँछु भनेर भाव दिनुभएको थियो । दोस्रो दिन डागेश्वर मन्दिरनजिकै देवल माविबाट गाल मटेला जाने बाटोमा चितुवा मृत फेला पर्‍यो । धामीले दिएको भावको आधारमा चितुवा मरेको हाम्रो बुझाइ हो ।”

उनले थपे, “मरेको चितुवामाथि धामीलाई बसाएर भण्डारी गाउँ पुगाउने र त्यसपछि डागेश्वरी मन्दिरमा पुगाउने तयारी छ ।”

इलाका वन कार्यालय अजयमेरुका प्रमुख सन्तोषराज भट्टका अनुसार चितुवाको घाँटीमा पासोको जस्तो घाउ छ । “मरेको चितुवा ल्याउनका लागि सो क्षेत्रमा एउटा टिम पुगिसकेको छ,” उनले भने ।