काठमाडौँ । काठमाडौँ क्षेत्र नं. १ बाट घण्टी चिह्नबाट उमेदवारी दिएका पुकार बम यसपालिको चुनावमा आफू जित्नेमा ढुक्क छन् । 

घण्टी राष्ट्रिय स्वतन्त्र पार्टीको चुनाव चिह्न हो । 

तेस्रोपटक उमेदवारी दिएका बम यसपटकको माहोल राम्रो देख्छन् । देशैभरिबाट पढेलेखेका, अनुभवी, विज्ञ र युवा उमेदवार आएकाले उनी उत्साहित छन् । 

क्षेत्र नं. १ बाट प्रकाशमान सिंहले तीनपटक जितिसकेका छन् । यसपालि पनि उनले उमेदवारी दिएका छन् । 

बम भन्छन्, “सबै ठाउँमा घरदैलो कार्यक्रम गरिरहदा उहाँ (सिंह) लाई जसरी पनि अब रोक्नुपर्छ भन्ने एक खालको केही लहर छ । त्यो लहरमा पहिले धेरैले आफ्नो मतलाई दानको रुपमा लिनुभयो । तीनपटक निसंकोच दिनुभयो ।”

“यसपटक जनताहरु सक्षम, अनुभवि परीक्षण र प्रमाणित भइसकेका युवा क्षेत्र नं. १ का जनताले खोजेका छन्,” उनले थपे, “तर यसपालि उहाँहरु मत दान नभई मत लगानी गर्दैछौँ भनिराख्नुभएको छ । जुन एकदमै राम्रो हो ।”

उनकाअनुसार २०७० र २०७४ को निर्वाचनको तुलनामा यसपटक मतदाताहरुमा आफ्नो मतलाई लिएर जागरुकता आएको छ । 

भन्छन्, “उमेदवारलाई बुझ्नुपर्छ । उसको पृष्ठभूमि र एजेन्डा के छ, भनेको एजेन्डामा अनुभव छ कि छैन भन्दै केरकार गर्न थाल्नुभएको छ । सचेत भएर मतदान गर्दै हुनुहुन्छ ।”

उनकाअनुसार जनताले पुकार बमलाई नभई विगत १५ वर्षदेखि काम गरिरहेको र विभिन्न आन्दोलन तथा अभियानको नेतृत्वको आधारमा जनताले मत दिने दाबी गर्छन् । 

भन्छन्, “विभिन्न काल चरणमा मैले शिक्षा, स्वास्थ्य, रोजगारी, महिला हिंसासँग जोडिएका आन्दोलन, विदेशमा बसेकालाई मतदान अधिकार, डा गोविन्द केसीको आन्दोलन, करोडौँ अर्बौँको नीतिगत र आर्थिक भ्रष्टाचारविरुद्ध आवाज र संविधान रक्षाको लडाइँलाई हेरेर मत दिनुहुन्छ भन्ने विश्वस्त छु ।”

उनी जुन एजेन्डा लिएर जनतामा मत माग्न गएका छन्, ती एजेण्डा आधाअधुरो भएको बताउँछन् । 

भन्छन्, “पानी पनि नखाई सडक संघर्षबाट ल्याएका ति एजेन्डाहरु कार्यान्वयन गर्नको लागि पनि यस चुनावमा मत दिनुहुन्छ भन्ने आशा छ । यो पुकार बमलाई होइन, उसले गरेको काम र नेतृत्वलाई हेर्नुहुनेछ ।” 

विगत छ महिनादेखि चुनावको तयारी सुरु गरेका बमले हालसम्म पाँच चरणको घरदैलो कार्यक्रम गरिरहेका छन् ।

उनले उन्नत संविधान, खुला सिंहदरबार, खुला संसद, शिक्षामा समान पहुँच र सर्वसुलभ हुनुपर्ने, स्वास्थ्य सर्वसुलभ र सबैको पहुँचमा हुनुपर्ने, प्रवासी नेपाली नागरिकलाई मतदान गर्ने अधिकार, महिलामैत्री समाज र संविधान, सम्पदा पर्यटनलगायतका एजेण्डाहरु लिएर आएका छन् । 

यसका अलवा उनले १० वटा स्थानीय र २० वटा अन्तर्राष्ट्रिय मुद्दा पनि उनले राखेका छन् । विगतमा स्वर्गीय उज्जवल थापासँग मिलेर तत्कालिन विवेकशील पार्टी स्थापना गरेका बम अहिले रवि लामिछानेको राष्ट्रिय स्वतन्त्र पार्टीको घण्टी चुनाव चिह्न लिएर लड्दै छन् । 

विवेकशील पार्टी त्यसपछि साझा पार्टीसँग मिल्यो । २०७४ को चुनावमा बाग्मति प्रदेशमा तेस्रो शक्तिको रुपमा आएको थियो । 

बम भन्छन्, “रवीन्द्र मिश्रले विचारभन्दा माथि देश भन्ने दस्तावेज ल्याउँदा विघटन हुने स्थितिमा आयो । तर मैले सुरुदेखि भन्दै आएको छु हामी हिजो पनि विवेकशील अभियानको रुपमा थियौँ, आज पनि र भोलि पनि अभियानको रुपमा रहनेछ । घण्टी चिह्न लिएर लडे पनि विवेकशीलकै निरन्तरताको रुपमा मैले लिएको छु ।”

यसै क्षेत्रबाट रवीन्द्र मिश्र राष्ट्रिय प्रजातन्त्र पार्टीबाट आफ्नो उमेदवारी दिएका छन् ।  पछिल्लो चुनावमा उनले १० हजार मत कटाएका थिए । 

विवेकशील साझा पार्टीबाट पनि शंकर बञ्जाडेले उमेदवारी दिएका छन् । यसपालिको प्रतिस्पर्धा हेर्न लायक हुनेछ ।

यस्तै, पुकार बमलाई काठमाडौँका मेयर बालेन शाहको समर्थन भन्ने समाचारबारे जिज्ञासा राख्दा उनले भने, “बालेनजीले आफैँले पुकार बमलाई समर्थन छ भनेर कुनै मञ्चबाट भन्नुभएको छैन । तर हिजो उहाँ उमेदवार हुँदा उहाँलाई जिताउन हिँडेका केही साथीहरुको भने मलाई पनि सहयोग छ । बीचमा मलाई आरोप पनि लाग्यो कि मैले उहाँको नाम बेचे भनेर । त्यस्तो होइन ।”

तर उच्च स्रोतका अनुसार उनले बालेन शाहलाई सहयोग गर्ने समूहको साथ खोजिरहेका छन् । 

शिक्षण पेशा अँगालेका बमलाई यो निर्वाचन प्रयोगात्मक लागे पनि निर्वाचन आयोगको रवैया भने उनलाई मन परेको छैन ।

नीति नियम ठूला पार्टीलाई सहयोग गर्ने र वैकल्पिक तथा स्वतन्त्र उमेदवारलाई अलि अनुदार भएको उनको आरोप छ । 

डा. तोषिमा कार्कीको केसदेखि सागर ढकालसम्मको कुरा गर्दा त्यस्तै देखिने उनको तर्क छ । 

भन्छन्, “ढकालजीलाई माइकसमेत प्रयोग गर्न नदिने तर एकदिन अघि प्रशासनकै आँखाअगाडि लाखौँको आमसभा, सयौँ बस र हेलिकोप्टर  प्रयोग गर्दा प्रशासन मौन छ । आयोगको अभ्यास देख्दा हामीले चाहेको परिवर्तन आउँदैन कि भन्ने डर पनि लागिरहेको छ ।”