बुटवल । सडक विभागको व्यापारिक मार्ग विस्तार आयोजनाले रूपन्देहीको बुटवल–बेलहिया सडकको ठेक्का सम्झौता तोड्न प्रक्रिया सुरु गरेको छ । निर्माण सम्झौता भएको ६ वर्षसम्म पनि सडक निर्माणको काम सम्पन्न नभएपछि आयोजनाले ठेकेदार कम्पनीसँगको ठेक्का सम्झौता अन्त्य गर्न प्रक्रिया थालेको हो ।

व्यापारिक मार्ग विस्तार आयोजनाले ठेक्का लगायतका कार्यको न्यून कार्य प्रगति भएको, म्याद समाप्त भएका र बाह्य समस्याविना पनि लामो समयसम्म निर्माणको कार्य रोकिएको भन्दै ठेक्का सम्झौता अन्त्य किन नगर्ने भन्दै सूचना प्रकाशित गरेको छ ।

आयोजनाका सूचना अधिकारी सविता ज्ञवालीले ठेकेदार कम्पनीलाई निर्माण कार्य अगाडि बढाउन विभिन्न मितिमा लिखित र मौखिक ताकेता गर्दासमेत सन्तोषजक कार्य प्रगति नभएको भन्दै सार्वजनिक खरिद ऐन २०६३ तथा नियमावली २०६४ बमोजिक ठेक्का रद्दको प्रक्रिया अगाडि बढाइएको बताइन् ।

उनले ठेक्का सम्झौता अन्त्य गर्नु नपर्ने कुनै मानासिव कारण भए सात दिनभित्र भरपर्दो स्पष्टीकरणसहित आयोजनाको कार्यालयमा उपस्थित हुन भनिएको बताइन् । उनले स्पष्टीकरण चित्तबुझ्दो नभए ठेक्का सम्झौताका सर्त र सीओसी तथा प्रचलित ऐन–नियम अनुसार कानुनी कारबाही अगाडि बढाउने बताइन् ।

आयोजनाले तीनवटा ठेक्का तोड्नेगरी प्रक्रिया सुरु गरेको छ । बिरुवा कन्स्ट्रक्सन प्रालि मध्यबानेश्वर काठमाडौंले लिएको ठेक्का नम्बर टीआरआईपी/३३७३१२४/विवि/ ०७३/०७४–००१, बिरुवा–श्रेष्ठ–एपेक्स जेभी काठमाडौंको ठेक्का नम्बर टीआरआईपी/३३७३१२४/विवि ०७१/०७२–००२ र द कञ्चनजंगा–बिरुवा जेभी, मध्यबानेश्वर काठमाडौंले ठेक्का पाएको ठेक्का नम्बर टीआरआईपी/३३७३१२४/विवि ०७३/०७४–००३ तोड्ने गरी प्रक्रिया अघि बढाएको हो ।

यी तीन वटा ठेक्का बेलहिया, पडसरी र बुटवलका हुन् ।