site stats
बाह्रखरी :: Baahrakhari
खेल
Global Ime bankGlobal Ime bank
माल्दिभ्सलाई ४–० ले हराउँदै नेपालको सानदार सुरुवात (तस्बिरसहित)

काठमाडौं । मेघराज केसीको प्रशिक्षणमा रहेको नेपाली युवा टोलीले आज माल्दिभ्सलाई ४–० ले हराउँदै यू–२० साफ च्याम्पियनसिपमा सानदार सुरुवात गरेको छ ।

भारतको भुवनेश्वरस्थित कालिङ्गा रंगशालामा नेपालले ४२औँ मिनेटमा दीपेश गुरुङले गरेको गोलबाट अग्रता लिएको थियो । कप्तान आयुष घलानले हानेको डाइरेक्ट फ्री किकलाई माल्दिभ्सका गोलकिपर शाइहान अलीले पन्च गरेर बचाएका थिए । तर, रिबाउन्डमा प्राप्त बललाई दीपेशले झण्डै २५ यार्डबाट हानेको सशक्त प्रहार गोलमा परिणत भएको हो । 

५८औँ मिनेटमा सुगम सुवालले नेपालको अग्रता दोब्बर बनाए । सुगमले काउन्टर अट्याकमा गोल गरेका थिए । उनले 'वान भर्सेस वान'मा दोस्रो बार च्यापेर हानेको प्रहारलाई माल्दिभ्सका गोलकिपरले रोक्न सकेनन् । 

६१औँ मिनेटमा कृतिशरत्न छुन्जुले तेस्रो गोल थपे । नेपालका कप्तान आयुषलाई माल्दिभ्सका हुसैन शाभिनले फाउल गरेपछि नेपालले पेनाल्टी अवसर पाएका थिए । उक्त अवसरलाई कृतिशरत्न छुन्जुले कुनै गल्ती नगरी गोलमा परिणत गरेका हुन् । 

इन्जुरी समयमा वैकल्पिक खेलाडी मनग्य नकर्मीले अर्को गोल थपेका हुन् । कृतिशरत्नको स्थानमा ८३औँ मिनेटमा मैदान छिरेका मनग्यले रिबाउन्डमा प्राप्त बलमा गोल गरेका हुन् । 

त्यसअघि पहिलो हाफमा पनि अधिकांश समय बल नियन्त्रणमा राखेको नेपालले गोलका केही राम्रा अवसर खेर फालेको थियो । २८औँ मिनेटमा नेपालका कप्तान आयुष घलानले पेनाल्टी क्षेत्रबाट बायाँ खुट्टाले हानेको प्रहार आकाशिएको थियो । ३२औँ मिनेटमा सुगम सुवालले पनि पेनाल्टी क्षेत्रबाट हानेको प्रहारले पनि पोस्टको दिशा लिन सकेन । ६९औँ मिनेटमा दीपेशले झन्डै २५ यार्डबाट हानेको फ्री किक माल्दिभ्सका किपरले पन्च गरेर बचाईदिएका थिए । 

२३औँ मिनेटमा माल्दिभ्सका जैन जफरको फ्रीकिकलाई नेपालका गोलकिपर ईश्वर गुरुङले बचाइदिएका थिए । 

यसअघि १९ र १८ वर्षको उमेर समूहमा हुँदै आएको यो प्रतियोगिता यसपटक २० वर्षमुनिको उमेर समूहमा हुन लागेको हो । नेपालले पहिलो र दोस्रो संस्करणको उपाधि जितेको थियो । पछिल्लो संस्करणको उपाधि भारतले जितेको थियो ।

प्रतियोगितामा नेपालले दोस्रो खेल श्रीलंकासँग साउन ११ गते, भारतसँग साउन १५ र बंगलादेशसँग साउन १७ गते खेल्नेछ । राउन्ड रोबिन लिगपछि तालिकाको शीर्ष दुई टोलीबीच अगस्ट ५ मा फाइनल खेल हुनेछ ।

तस्बिरहरू : एन्फा ।

प्रकाशित मिति: सोमबार, साउन ९, २०७९  १८:१८
worldlinkworldlink
प्रतिक्रिया दिनुहोस्
MPG Admark South Asian UniversityMPG Admark South Asian University
Nepal Life Insurance banner adNepal Life Insurance banner ad
Ncell Side Bar LatestNcell Side Bar Latest
Bhatbhateni IslandBhatbhateni Island
सम्पादकीय
सरकारले तत्काल सम्बोधन गरोस् !
सरकारले तत्काल सम्बोधन गरोस् !
Hamro patroHamro patro