काठमाडौं । पछिल्लो समय कोभिड १९ संक्रमितको संख्या दैनिक ३०० भन्दा धेरैले थपिरहेको छ । साउनको पहिलो साता नै देशभर दुई हजार ५६५ जनामा संक्रमण पुष्टि भएको छ । सक्रिय अहिले संक्रमितको संख्या तीन हजार १७७ पुगेको छ ।
सक्रिय संक्रमितमध्ये १४२ जना अस्पतालमा उपचाररत रहेको स्वास्थ्य तथा जनसंख्या मन्त्रालयको तथ्यांक छ । अस्पतालमा रहेकामध्ये आइतबारसम्म २२ जना आईसीयूमा र दुईजना भेन्टिलेटरमा छन् ।
दोस्रो लहरको संक्रमणमा अक्सिजन नपाएकै कारण धेरैले ज्यान गुमाउनुपरेकाले यसपटक भने अक्सिजन चाहिने संक्रमितलाई सिधै आईसीयूमा भर्ना गर्ने गरिएको वीर अस्पतालका कोभिड कन्सल्टेन्ट डा. अच्युत कार्की बताउँछन् ।
"यसअघिका लहरहरूमा बचाउन सकिने संक्रमितहरूको पनि अक्सिजनकै अभावमा अकालमा मृत्यु भयो । यसपटक भने अक्सिजन चाहिने संक्रमितलाई सिधै आईसीयूमा भर्ना गर्ने गरिएको छ । त्यसैले पनि आईसीयूमा संक्रमितको संख्या धेरै देखिएको हो," डा. कार्कीले भने ।
यसरी आईसीयूमा राखिएका बिरामी केही दिनमा नै संक्रमणमुक्त भई डिस्चार्ज हुने गरेका छन् । वीर अस्पतालमा आइतबारसम्म ६ जना आईसीयूमा र दुईजना भेन्टिलेटरमा उपचाररत छन् ।
तस्बिरहरू : अभिषेक महर्जन/बाह्रखरी
