बेइजिङ । राष्टपति सी जिनपिङ र अन्य वरिष्ठ राजनीतिज्ञहरूले स्वेदेशमै उत्पादित कोभिड १९ विरुद्धको खोप लगाएको चीनले जनाएको छ । 

खोपको दर र त्यसमा पनि विशेषगरी बुस्टर डोजप्रति आकर्षण बढ्ने अभियान चलाउने क्रममा सी लगायत अन्य वरिष्ठ नेताहरूले चिनियाँ खोप नै लिएको खबरलाई प्राथमिकताका साथ सार्वजनिक गरिएको हो ।

चीनको राष्ट्रिय स्वास्थ्य आयोगका उपाध्यक्ष जेंग यिसिनले यसबाट चिनियाँ नेतृत्वले चिनियाँ खोपहरूमाथिको विश्वास प्रकट गरेको देखिएको बताएका छन् । यसरी स्वास्थ्य सम्बन्धी यस्तो संवेदनशील सूचना बिरलै मात्र यसरी सार्वजनिक गर्ने गरिन्थ्यो । 

जेंग भन्छन्, “मुलुकका नेताहरूले कोभिड १९ विरुद्धको सम्पूर्ण खोप स्वदेशमै बनेको प्रयोग गरेका हुन् । त्यसले महामारी रोकथाम र त्यसका लागि भइरहेका काममा उनीहरूले दिएको महत्व र स्वदेशमा निर्मित खोपमाथिको विश्वास झल्काउँछ ।”

चीनका सरकारी अधिकारीहरू खोप दर बढाउने कार्यमा लागिपरेका छन् । मुलुकलाई पूर्ण रूपमा पुनः खुला गर्न अझै पनि खोप लिनेको संख्या कम मानिएको छ । 

चीनले अझै सम्म ‘शून्य कोभिड” नीति अपनाउँदै, आम स्वास्थ्य परीक्षण, कडा एकान्तवास नियमहरू र स्थानीय लकडाउन कार्यान्वयन गर्दै आएको छ ।

यद्यपि विश्वका अन्य मुलुकका तुलनामा चीनको कोरोना संक्रमणका कारण मर्नेका संख्या निकै कम रहेको छ । राष्ट्रपति सीले ‘शून्य कोभिड नीति’को कुनै विकल्प नरहेको बताउँदै आएका छन् । 

जोन हप्किन्स युनिभर्सिटीका अनुसार महामारी सुरु भएयता चीनमा २१ लाख ६७ हजार ६१९ जना संक्रमित भएका छन् । तीमध्ये १४ हजार ६ सय ४७ जनाको मृत्यु भएको छ । बेलायतमा भने २ करोड ३० लाख ८८ हजार ७४ जना संक्रमित भएकोमा १ लाख ८१ हजार ३९८ जनाको मृत्य भइसकेको छ ।   

बीबीसीबाट ।