काठमाडौं । नेकपा (एमाले)का सांसद महेश बस्नेतले एम. अधिकारी खोज्नेहरूलाई प्रधानमन्त्री शेरबहादुर देउवा र नेकपा (माओवादी केन्द्र) अध्यक्ष पुष्पकमल दाहाल 'प्रचण्ड'लाई कारबाही गरेर देखाउन चेतावनी दिएका छन् । आजको प्रतिनिधिसभा बैठकमा उनले सांकेतिक नामबाट उनीहरूलाई कारबाही गर्नुपर्ने बताए । 

“एम. अधिकारीहरू खोजिरहेका छन् ।  देशी विदेशी शक्ति गुहार्न राष्ट्रपति र प्रधानमन्त्री पालोपालो बनेर राज्यको दोहन गर्ने र पारिवारवाद लाद्ने एस. देउवा, पी. दाहाल र नेत्री ए. राणा देउवाहरूलाई कारबाही गर्नुपर्ने होइन र ?,” उनले भने 

उनले बजेटमा करको दर हेरफेर गरेको भन्दै पूर्व अर्थमन्त्रीलाई कारबाही गर्न आग्रह गरे । 

“बजेटमा रातारात कर र भन्सारका दर गडबड गरेर, सीसीटीभीलगायतका प्रमाण नष्ट गर्ने र कमिसन/अर्ब गडबडी गर्ने माओवादी जे. शर्माको खोजी गरेर कारबाही गर्नुपर्ने होइन र ? पेट्रोलिएमको भाउ महँग्याएर कालोबजारीलाई  प्रोत्साहन गर्ने आपूर्तिमन्त्री डी. बडुलाई कारबाही गर्नुपर्ने होइन र ?,” उनले प्रश्न गरे । 

एमालेको अर्थ तथा योजना विभागमा रहेका एम. अधिकारी र राष्ट्र बैंककमा गर्भनर महाप्रसाद अधिकारी एकै भएको भन्दा चर्चा भइरहेको छ ।