बुटवल । रुपन्देहीको भैरहवास्थित भीम अस्पतालमा कार्यरत स्वास्थ्यकर्मीले कोरोना जोखिम भत्ता नपाएको भन्दै आन्दोलनमा उत्रिने चेतावनी दिएका छन् । संघर्ष समिति गठन गरी उनीहरूले जोखिम भत्ता नपाए आन्दोलनका कार्यक्रम घोषणा गर्ने बताएका छन् ।

संघर्ष समितिका अध्यक्ष गोपाल उपाध्यायले सरकारले गरेको निर्णयानुसार श्रमको मूल्य पाउनुपर्ने स्वास्थ्यकर्मीको माग रहेको बताए । “सरकारले कोरोना जोखिम भत्ता दिने नभनेको भए हामीले माग्ने थिएनौँ,” उनले भने, “सरकारले गरेको निर्णय र आफूहरूले पाउनुपर्ने अधिकार मागेका हौँ ।”

०७८ साल वैशाखदेखि कोरोना महामारीको दोस्रो लहरका समयमा स्वास्थ्यकर्मीले जोखिममा सेवा गरेको बारे सबैलाई अवगत भएको उनको भनाइ छ । उनले प्रदेश सरकारले ५० प्रतिशत र संघीय सरकारले ५० प्रतिशत गरी १०० प्रतिशत भत्ता दिने भनिए पनि हालसम्म एक रुपैयाँ नपाएको बताए ।

स्वास्थ्यकर्मी उपाध्यायले भने, “केही नपाएपछि माग्दै नमाग्ने भन्ने कुरा हुँदैन । देशका १७ हजार स्वास्थ्यकर्मी कोरोना जोखिम भत्ता पाउनबाट वञ्चित छन् ।”

यही असार १६ गतेसम्म संघर्ष समितिले आन्दोलनका कुनै कार्यक्रम नगर्ने र सरकारको निर्णय पर्खने उनले बताए । माग पूरा नभए सोही दिन आन्दोलनका कार्यक्रम घोषणा गर्न सकिने उनको भनाइ छ ।

उपाध्यायका अनुसार भीम अस्पतालमा कार्यरत स्वास्थ्यकर्मीले ६ महिनाको एक करोड ४९ लाख ८० हजार रुपैयाँ रकम पाउन बाँकी छ ।

संघर्ष समितिका उपाध्यक्ष एवं बालरोग विशेषज्ञ डा. आरिफ हुसेन आफूहरूको आन्दोलन स्वास्थ्यकर्मीको हक, अधिकारको पाउनका लागि हुने बताउँछन् । उनले भने, “हाम्रा कुरा स्वास्थ्य मन्त्रालय र नेपाल सरकारले सुनोस्, अस्पतालबाट पठाइएको कर्मचारीले राम्रो प्रतिक्रिया लिएर आउनुस् भन्ने अपेक्षा हो ।”

स्वास्थ्यकर्मीले कोरोना महामारीका बेला आफ्नो ज्यान जोखिममा राखेर काम गरेको नागरिकले राम्रोसँग बुझेको उनले बताए । “यदि, सरकारले भत्ता नदिने भनेको भए पनि हामी काम गर्दथ्यौँ । कहिल्यै पनि स्वास्थ्यकर्मी पछाडि हट्ने कुरै आउँदैन,” उनले भने, “भोलिका दिनमा समस्या आए भने पनि हामी पछाडि हट्ने छेनौँ । ज्यानको बाजी लगाएर काम गर्छौँ ।”

सरकारले झुटो आश्वासन दिएर स्वास्थ्यकर्मीको भावनासँग खेल्नु उचित नभएको उनको भनाइ छ । सरकारले स्वास्थ्यकर्मीको माग असार मसान्तसम्म सम्बोधन गर्नुपर्ने उनले माग गरे ।

संघर्ष समितिका सचिव जनकराज पन्तले कोरोना जोखिम भत्ता हालसम्म पनि पाउन नसकेकाले आन्दोलनमा उत्रिनुपर्ने बाध्यता रहेको बताए ।

उक्त अस्पतालका १७४ स्वास्थ्यकर्मीले कोरोना जोखिम भत्ताबापतको रकम पाएका छैनन् । स्वास्थ्यकर्मीले संघर्ष समितिमार्फत रुपन्देहीका प्रमुख जिल्ला अधिकारी ऋषिराम तिवारीको पनि ध्यानाकर्षण गराएका थिए ।

भीम अस्पताल विकास समितिका अध्यक्ष कुलप्रसाद न्यौपाने सरकारले स्वास्थ्यकर्मीलाई आश्वासन दिएकाले जोखिम भत्ता उपलब्ध गराउनुपर्ने बताउँछन् । उनले महामारीमा काम गरेका स्वास्थ्यकर्मीले भत्ताको अपेक्षा गर्नु स्वाभाविक भएको बताए । स्वास्थ्यकर्मीले पाउनुपर्ने भत्ताका लागि पहल भइरहेको उनले जानकारी दिए ।

अस्पतालकी मेडिकल सुपरिटेन्डेन्ट डा. शकुन्तला गुप्ताले स्वास्थ्यकर्मीले पाउनुपर्ने कोरोना जोखिम भत्ताका लागि पटक–पटक मन्त्रालयमा पत्र पठाइएको बताइन् । अहिले एक कर्मचारीलाई काठमाडौंस्थित मन्त्रालयमै पठाएर भत्ता उपलब्ध गराउन आग्रह गरिएको उनले जानकारी दिइन् ।

उनले स्वास्थ्यकर्मीलाई सेवा ठप्प पार्ने काम नगर्न आग्रह गर्दै भत्ता उपलब्ध गराउन निरन्तर पहल गरिरहेको बताइन् । “पैसा दिन तयार छौँ, तर पैसा नआएकाले रोकिएको हो ।”