काठमाडौं । जेठको गर्मीले काठमाडौं जति तातेको छ, त्योभन्दा बढी स्थानीय चुनावको मत गणनाको नतिजाले काठमाडौंमा राप बढेको छ । राष्ट्रिय सभागृहमा वैशाख ३१ गतेदेखि काठमाडौंको मेयरको मतगणना सुरु हुुँदा बालेनले अग्रता लिएका थिए । उक्त अग्रता आजको दिनसम्म कायमै छ । 

अग्रता मात्रै होइन बालेनले ८ हजारभन्दा बढी मतको मतान्तर कायम गर्न थालेपछि सभागृहमा आउने जनप्रतिनिधि, नेताहरू, मतगणना गर्ने प्रतिनिधिहरू ‘के बालेन शाहले चुनाव जित्छन् त’ भन्दै सघन छलफलमा बसेका भेटिन्छन् । मेयरका लागि उठ्ने भन्नेबित्तिकै क्रेज बटुलेका ३२ वर्षे बालेनले दुई ठूूला परम्परागत पार्टीको नाकमा यसरी दम गर्नेछन् भनेर कसले सोचेको थियो र ? सभागृहमा बालेनलाई आएको मत देखेर नेपाली कांग्रेस, नेकपा एमाले र राष्ट्रिय प्रजातन्त्र पार्टीका कार्यकर्ता र प्रतिनिधिहरू अचम्मित मुद्रामा देखिन्छन् । 

हालसम्म ११ वटा वडाको मत गणना भइरहेको र १, २ र ३ वडाको मत गणना सकेर विजय घोषणा भइसकेको छ । जसमा एमालेले वडा २ र ३ मा प्यानेलसहित विजयी भएको छ । तर, एमाले जितेका यी वडामा पनि मेयरमा भने बालेनकै लागि मत बढी गएको छ । बालेनको ल्याएको मतसँगै हिजो सामाजिक सञ्जालको चर्चाले चुनाव जित्दैन भन्ने नेताहरूले आज कोर सिटीले जितको सुनिश्चतता कायम छ भन्दै अन्तर्वार्ता दिइरहेका छन् ।

एमाले नेता केशव स्थापित आफूले जित्नेमा ढुक्क रहेको दोहो¥याइरहेका छन् । आफू पहिलो, कांग्रेस दोस्रो र बालेन तेस्रो हुने उनले भनिरहेका छन् । तर, बालेनका प्रतिनिधि भूपतिन्द्र शाह भने कोर सिटीमा बालेनको प्रतिस्पर्धा एमालेसँग नभई कांग्रेससँग हुने दाबी गर्छन् । मत गणनामा निरन्तर खटिरहेका शाहका अनुसार अहिले गणना गरिरहेका वडामा स्थापितलाई सोचेको भन्दा कम मत आएकोले अबको प्रतिस्पर्धा भने सिंह मात्र भएको उनको भनाइ छ । भन्छन्, “स्थापितलाई मत धेरै आउने अपेक्षा गरेको वडामा हामीले धेरै पाएका छौँ भने कोर सिटीमा त उहाँको चान्स नै छैन । त्यहाँ हाम्रो प्रतिस्पर्धा सिर्जना सिंहसँग मात्रै हुनेछ ।”

कोर सिटीमै आशा गरी बसेका छन्, नेपाली कांग्रेसका नेताहरू पनि । कांग्रेस नेता सुसन वैद्य शाहको भनाइमा सहमत जनाउँदै कोर सिटीमा बालेन र कांग्रेसबीच नै प्रतिस्पर्धा हुनेमा ढुक्क छन् । भन्छन्, “मेयरको रेसबाट स्थापित आउट भइसक्नुभयो । कोर सिटीमा हाम्रो प्रतिस्पर्धा बालेनसँग मात्रै हुनेछ ।” 
यता स्थानीय चुनावमा दलहरूलाई आएको मतको ट्रेन्ड देखेर नेताहरू आफैँ छक्क परेका छन् । एमालेका बाग्मती प्रदेश सांसद गणेशप्रसाद दुलाल मतदाताले यसपटकको चुनावमा कसरी मत हाले भनेर अड्कल गर्नै नसकिएको बताउँछन् । भन्छन्, “खोई, जनताले के गरी भोट हाले भन्नै सक्दैनौँ । वडाध्यक्षमा एमालेलाई नै दिएका छन् । तर, मेयरमा पत्याएनन् ।” 

उनी पनि कोर सिटीमा पुगेपछि एमाले लयमा फर्किने दाबी गर्छन् । भन्छन्, “कोर सिटीमा गन्न थालेपछि मात्रै केही भन्न सक्छाँै । विगतमा विद्या सुन्दर शाक्यले पनि त्यहीँबाट १२ हजार भोट बढी ल्याई जितेका थिए ।”

त्यसो त राजनीतिक दलले राम्रा उमेदवार नउठाउँदा जनताले दिक्क भएर बालेनलाई भोट दिएको भन्दै बालेनको मत पञ्चायती कालमा नानीमैयाँ दाहालले पाएको जस्तै हो भनेर दाहालको जितसँग तुलना गर्नेको पनि कमी छैन । 

स्ट्रक्चरल इन्जिनियरसमेत रहेका बालेन ¥यापर पनि हुन् । उनले उमेदवारी घोषणा हचुवा भरमा नगरेको यस पक्तिंकारलाई चुनावअघि बताएका थिए । पाँच वर्षदेखि तयारी गरेका बालेन चुनावमा हाबी हुनसक्छ भनेर बृहत् अध्ययन गरेर रिपोर्ट बनाएर कांग्रेसका शीर्ष नेतालाई बुझाएको वैद्य पनि सम्झन्छन् । 

तर, नेतृत्व नातावाद, कृपावाद र आफ्नो हात जगन्नाथ नीतिले अघि बढ्दा जनताले पनि बालेनलाई मत दिएर आफ्नो निर्णय सुनाइरहेका छन् । जहाँ कोर सिटीको जनता आफ्नो पकेटको भन्दै दाबी गरिरहेका यी नेतालाई कोर सिटीमै बस्ने बासिन्दाले भने सामाजिक सञ्जालमार्फत प्रश्न तेस्र्याइरहेका छन्, “के कोर सिटीमा बस्नेचाहिँ कांग्रेस र एमालेको दास हो ? उनीहरूले जे भन्यो त्यसैमा भोट हाल्ने ? हाम्रो विवेक छैन ?”