![ललितपुरका उमेदवारहरू के भन्छन् ?](https://12khari.top/uploads/posts/Congress1650895662.jpg)
काठमाडौं । ललितपुर महानगरपालिकाको मुख्य निर्वाचन अधिकृतको कार्यालय सोमबार उल्लासमय देखिन्थ्यो ।
राजनीतिक दलका कार्यकर्ता, समर्थक र जनप्रतिनिधिहरूको भिड कार्यालयको गेट बाहिरदेखि भित्रसम्म खचाखच थियो ।स्थानीय चुनाव २०७९ को लागि आइतबार र सोमबार उमेदवारी मनोनयन दर्ता गर्न राजनीतिक पार्टीहरू बाजागाजासहित कार्यालय पुगेका थिए ।
नेकपा एमालेले आधुनिक ब्यान्ड बाजा र नेवारी बाजा बजाउँदै परिसर उल्लासमय बनाएको थियो । एकातिर ब्यान्ड बाजामा युवतीहरू नाच्दै थिए भने अर्कोतिर एक हुल मानिस नेवारी बाजाको तालमा झुमिरहेका थिए ।
त्यही माहाेलमा नेवारी पोसाकमा सजिएकी थिइन् शान्ति अवाले । उनी पाटन वडा नंं ९ को वडा अध्यक्षका लागि उमेदवारी दिएका आफ्ना दाजु शुकराजा महर्जनको समर्थनका लागि आएकी रहिछन् । पहिलोपटक एमालेबाट टिकट पाएर वडाध्यक्षमा उठेका शुक्रराज पेशाले घर बनाउने ठेकेदार हुन् ।
एमालेबाट वडाध्यक्ष उठेका दाजुलाई समर्थन गर्न आएकी उनले मेयरमा भने (कांग्रेसका) चिरिबाबु महर्जनले जिते पनि ठिकै हुने पाे सुनाइन् । यस्तो किन त ? शान्ति भन्छिन्, “मेयर ठिक छ । काम भएको छ । वडामा अब दाइले पनि चुनाव जित्ने विश्वास छ ।”
आयोगको परिसरको चउरमा उमेदवारी दर्ताको निवेदन भर्नमा प्रतिनिधिहरू व्यस्त देखिन्थे ।
सत्ता गठबन्धनको तर्फबाट ललितपुर महानगरमा जनता समाजवादी पार्टीले वडाध्यक्षहरूका लागि मात्र टिकट पाएको छ । वडा नम्बर १४ का लागि निवेदनपत्र भर्न सहयोग गरेका समर्थक शिवकुमार पांगेनाहाङ लिम्बुले गठबन्धनले जे भन्यो त्यहीअनुसार मनोनयन दर्ता गरेको सुनाए ।
उनी भन्छन्, सम्पूर्ण रूपमा हेर्दा ललितपुर महानगरको मेयर चिरिबाबुले राम्रो काम गरेको सञ्चारमाध्यममा मैले सुनेको छु । धेरै क्षेत्रमा राम्रो काम भएको देखिन्छ । तर उनी आफ्नै वडाका वडाध्यक्षबाट भने सन्तुष्ट छैनन् । “मेरो वडामा वडाध्यक्ष कांग्रेसकै भएपनि उहाँले त्यति काम गर्न सकेको मलाई महसुस भएको छैन,” उनले आफ्नो असन्तुष्टि व्यक्त गरे ।
वडा १४ मा रामबहादुर महत नेपाली कांग्रेसबाट अध्यक्ष निर्वाचित भएका थिए ।
वडा सदस्यमा नै खुसी
विष्णुमाया नेपालीले ललितपुर महानगरको वडा नं. २ बाट पुनः वडा सदस्यका लागि उमेदवारी दिएकी छन् । गत चुनावमा पनि नेकपा (एमाले)बाट सोही पदमा जितेकी उनले आफूले गरेकाे कामकाे बारेमा सुनाइन्, “महिला संगठन र बाल क्लब गठन गरे । मेरो संयोजकत्वमा अहिले महानगरमा दसवटा महिला समूह छ । बाल क्लब गठन गर्दा चुनौती पनि आए ।”
उनले वडामा दलित महिला भएपनि प्रष्ट रूपमा देखिने गरी विभेद नभोगेको बताइन् । “भित्री रूपमा कसको मनमा के छ भन्न सकिन्न,” विष्णुमायाले दृढतापूर्वक भनिन्, “जुनसुुकै विभेदविरुद्ध हिम्मतसाथ लडेको छु । साथीहरूको पनि सहयोग छ ।” आफ्नो प्यानलले नै जितेको भएर सहयोग पुगेको उनको बुझाइ छ ।
यस्तै, सरिता महर्जनले वडा नम्बर १२ का लागि वडा सदस्यमा पुनः एमालेबाटै उमेदवारी दिएकी छन् । अहिले पनि जित हासिल गर्ने उनको विश्वास छ, “हामीले प्यानल नै जितेका थियौँ । यसपटक पनि त्यही दोहोर्याउँदै छौँ ।”
सरिताले वडा सदस्य भएपछि स्वास्थ्य क्षेत्र, महिला र ज्येष्ठ नागरिकका विषयमा काम गरेकी थिइन् । मेयर फरक पार्टीको हुँदा कतिपय प्रोजेक्ट (योजना) पाउन कठिन भएको उनको भोगाइ छ । “मैले प्रत्यक्ष भोगेकी छैन । तर वडाध्यक्षको भनाइ सुनेको छु । फरक पार्टी भएकाले कतिपय विकास निर्माणको प्रोजेक्ट पाउन अलि गाह्राे भएको थियो,” सरिताले जनप्रतिनिधिको रूपमा आफ्नो अनुभव साटिन् ।
यसपटक पनि महजर्न-व्यञ्जनकार आमनेसामने
ललितपुरमा सत्ता गठबन्धनको तर्फबाट चिरिबाबु महर्जनले मेयरका लागि मनोनयन दर्ता गराएका छन् । उपमेयरमा बाबुराज बज्राचार्यले माओवादीको तर्फबाट उमेदवारी दर्ता गरेका छन् ।
उपमेयरमा उमेदवारी दर्ता गरेपछि बज्राचार्यले आफू विजयी हुने विश्वास व्यक्त गरे । उनले भने, “गठबन्धनको साझा उमेदवार भएर जाँदा उपमेयर पर्यो । पार्टीले आवश्यकता भएरै मलाई पठाएको होला । म जित्छुु भन्ने विश्वास छ ।”
उपमेयरको भूमिकासम्बन्धी स्पष्ट कानुनी व्यवस्था भएकाले विजयी भएमा काम गर्न सक्ने बाबुराजको दाबी छ । जितेपछि काम गर्ने दाबी गर्दै उनले भने, “जाने हो । गएर कामै गर्ने हो । गुनासो गर्ने मौका म दिन्न । काम गर्न सकिन भने मूल्याङ्कन गर्ने तपाईं जनता हुनुहुन्छ ।”
ललितपुर महानगरबाट मेयरमा १२ र उपमेयरमा ९ जनाले उमेदवारी दिएका छन् । एमालेबाट यसपटक पनि हरिकृष्ण व्यञ्जनकारले मेयरमा उमेदवारी दर्ता गराएका छन् । पछिल्लो चुनावमा उनी चिरिबाबुसँग मात्र ३२६ मतले हारेका थिए । यस्तै, सरीना लाखे श्रेष्ठले मेयर पदको लागि स्वतन्त्र उमेदवारीमा नाम दर्ता गरेकी छन् ।