जनकपुरधाम । जनकपुरधाममा सीताराम विवाहपञ्चमीको उत्सवले रौनक छाएको छ । शुक्रबारदेखि विधिवत् रूपमा सप्ताहव्यापी महोत्सव अन्तर्गत तेस्रो दिन आज धनुष यज्ञ मनाइएको छ । त्रेता युगमा भगवान रामले सीतासँग विवाह गर्न धनुष भाँचेर विवाह गरेको जनविश्वास छ । विवाहपञ्चमीको पहिलो दिन नगरदर्शन र दोश्रो दिन शनिबार फूलबारी लीला सम्पन्न भइसकेको छ ।

सप्ताहव्यापी विवाहपञ्चमीको चौथो दिन भोलि (सोमबार) तिल्कोत्सव, मंगलबार राम र जानकीको मटकोर रहेको छ भने बुधबार मुख्यदिन विवाह हुने कार्यतालिका रहेको छ । बिहीबार रामकलेवा गरी विधिवत रूपमा विवाहपञ्चमी महोत्सव समापन हुनेछ ।

त्रेता युगमा भगवान राम र आदर्श नारी सीताबीच विवाह भएको स्मरणमा जनकपुरमा प्रत्येक वर्ष सप्ताहव्यापी रूपमा धुमधामसँग विवाहपञ्चमी महोत्सव मनाउने गरिन्छ ।

भरिभराउ जनकपुर

जनकपुरधाम अहिले महोत्सवमा सहभागी हुन आएका श्रद्धालुहरूले भरिभराउ भएको छ । विवाहपञ्चमी महोत्सवका लागि नेपालको विभिन्न जिल्लासहित भारतबाट समेत श्रद्धालु आएका छन् । यहाँ विवाहपञ्चमीका लागि लागि चहलपहल बढेको जानकी मन्दिरका सहायक महन्थ रामरोसन दासले जानकारी दिए ।

कोरोना भाइरसका कारण प्रभावित हुँदै आएको विवाहपञ्चमीमा यस वर्ष करिब पाँच लाख श्रद्धालु आउने अनुमान गरिएको छ ।

बुधबार सार्वजनिक बिदा

प्रदेश २ सरकारले विवाह पञ्चमीको अवसरमा बुधबार सार्वजनिक बिदा दिएको छ । शुक्रबारबाट सुरु भएको सप्ताहव्यापी कार्यक्रम सीताराम विवाह पञ्चमीका लागि विदा दिइएको हो । जनकपुरधाम उपमहानगरपालिकाले नगरभित्र रहेको सरकारी र निजी विद्यालयमा तीन दिन सार्वजनिक बिदा दिएको छ । 

तीन दिन विद्यालय बन्द रहने

मंगलबारदेखि बिहीबारसम्म शिक्षण संस्था बन्द गर्ने निर्णय भएको जनकपुरधाम उपमहानगरपालिकाका महाशाखा प्रमुख मेहिलाल यादवले जानकारी दिए । सूचनामा विवाह पञ्चमी मेलाका कारण हुने भीडभाडलाई मध्यनजर गर्दै पालिकाभित्र रहेका सामुदायिक, निजी विद्यालय तथा शिक्षण संस्थाहरूलाई मंसिर २१ देखि २३ गतेसम्म बन्द गर्ने निर्णय भएको उल्लेख गरिएको छ । 

माछा, मासु र मदिरामा रोक

विवाहपञ्चमीकै लागि एक हप्ता जनकपुरधाम परिक्रमा क्षेत्रमा माछा, मासु र मदिरा बिक्री वितरणमा रोक लगाइएको छ । मंसिर २६ गतेसम्म पालिकाले माछा, मासु र मदिरा बिक्री वितरणमा रोक लगाइएको हो । विभिन्न व्यपारीहरूको संगठनले यो निर्णयलाई स्वीकार गरे पनि लुकिछिपी व्यपारीहरूले माछा, मासु र मदिरा बिक्री वितरण गर्ने गरेको पाइएको छ ।