चितवन । चितवनको पुल्चोकमा ट्रकले स्कुटरलाई ठक्कर दिँदा आज एकजनाको मृत्यु भएको छ । एकजना घाइते छन् ।

दुर्घटनामा स्कुटरमा पछाडि सवार भरतपुर महानगरपालिका–१५ की विणु दवाडीको मृत्यु भएको हो । सोही स्थानकी चालक जस्मिन न्यौपाने घाइते भएकी छन् ।

जिल्ला प्रहरी कार्यालय चितवनका अनुसार भरतपुर महानगरपालिका–३, पुल्चोकमा गैँडाकोटबाट चौबीसकोठीतर्फ जाँदै गरेको ना५ख ५८१६ नम्बरको ट्रकले सोही दिशातर्फ जाँदै गरेको ना५९प ३५०४ नम्बरको स्कुटरलाई ठक्कर दिएको थियो ।

दुर्घटनामा गम्भीर घाइते भएकी दवाडीको चितवन मेडिकल कलेज भरतपुरमा उपचारको क्रममा दिउँसो करिब सवा २ बजे मृत्यु भएको हो । चालक न्यौपानेको सोही अस्पतालमा उपचार भइरहेको छ । उनको अवस्था मध्यम रहेको प्रहरीले जनाएको छ । ट्रक चालक प्रहरीको नियन्त्रणमा छन् ।