चितवन । भरतपुर महानगरपालिकाले आर्थिक वर्ष २०७८/०७९ का लागि करिब ४ अर्ब ८१ करोड रुपैयाँ बराबरको बजेट नगरसभामा प्रस्तुत गरेको छ । 

बिहीबार भरतपुर महानगरपालिकाको नगर सभाको नवौँ अधिवेशनमा उपप्रमुख पार्वती शाह ठकुरीले ४ अर्ब ८१ करोड १२ लाख ६५ हजार रुपैयांँको बजेट नगरसभामा प्रस्तुत गरेकी हुन् ।

बजेटमा आन्तरिक आयतर्फ १ अर्ब २० करोड रुपैयाँ (घरजग्गा रजिस्ट्रेसन एवम् खानी तथा खनिजजन्य पदार्थको बाँडफाँडबाट प्राप्त आय समेत), अन्तरसरकारी वित्तीय हस्तान्तरणबाट रु १ अर्ब ७७ करोड २९ लाख ८३ हजार, केन्द्र तथा प्रदेश सरकारको राजस्व बाँडफाँडबाट प्राप्त रु ४४ करोड ८२ लाख ८२ हजार, जनसहभागिताबाट रु ३० करोड, बैंक मौज्दात रु १ अर्ब, मर्मत सम्भार कोष बाट रु ३ करोड, सडक बोर्ड नेपालबाट रु ३ करोड र जिल्ला समन्वय समिति चितवनबाट रु ३ करोड रुपैयांँ आय हुने अनुमान गरिएको छ ।

अन्तरसरकारी अख्तियारीबाट अनुमानित रु १ अर्ब २० करोड मुल सञ्चित कोषमा प्राप्त नहुने भएकाले अन्तर सरकारी अख्तियारी शीर्षकबाट नै खर्च तथा लेखाङ्कनको व्यवस्था गरिने प्रस्तुत बजेटमा उल्लेख छ ।