चितवन । सरकारको पछिल्लो कार्यशैलीको विरोधमा नेपाली कांग्रेस चितवनले चरणबद्ध आन्दोलनलाई निरन्तरता दिएको छ ।

सांसद अपहरण, अध्यादेशलगायत चितवनमा भएको कोरोना बिशेष अस्पतालको अनियमितताको सत्यसत्य छानबिन गर्न ढिलाइ गरेको भन्दै दैनिक प्रदर्शन गर्दै आएको छ । आज तरुण दल चितवनले चौबीसकोठीमा सरकारको विरोधमा प्रदर्शन गरेको हो । 

तरुण दलको अगुवाइमा भएको प्रदर्शनमा नेपाली कांग्रेस चितवनका सचिवद्वय उत्तम जोशी, राजीव न्यौपाने, तरुण दल चितवनका अध्यक्ष राजन ताम्राकार, पूर्वअध्यक्ष राजेश्वर खनाललगायत कांग्रेसका अन्य भ्रातृ संगठनले ऐक्यबद्धता जनाएका थिए । 

सो क्रममा प्रतिक्रिया दिँदै सचिव जोशीले सरकारको पछिल्लो कार्यशैलीप्रति जनता निराश भएको भन्दै लकडाउनको समयमा पनि प्रदर्शन गर्न बाध्य भएको बताए । महामारीको समयमा पनि भष्ट्राचार र अनियमितता बढ्दै गएको भन्दै उनले यस्ता दोषीलाई कारबाही गर्नुपर्ने भन्दै आक्रोश पोखे । भष्ट्राचारी र अनियमितता गर्नेलाई छानबिन गरी कानुनी दायरामा ल्याउनुको सट्टा उल्टै संरक्षण गरेकाले कांग्रेस सडक संघर्षमा आउनुको विकल्प नरहेको बताए । “हामी अझ सशक्त ढंगले सडक संघर्ष चर्काउँछौं, जबसम्म दोषीलाई कारबाही हुँदैन,” उनले भने ।

संगठनका विभिन्न पदाधिकारी, विद्यार्थीहरूले सरकारको विरोधमा लेखिएका विभिन्न प्लेकार्ड बोकेका थिए । नेपाली कांग्रेस चितवनले केही दिनदेखि भ्रष्टाचार र अनियमतताको सत्यतथ्य छानबिन गर्नुपर्ने माग गर्दै प्रधानमन्त्रीलाई ज्ञापनपत्र बुझाउने, सडक प्रदर्शन गर्ने, मसाल जुलुस निकाल्नेलगायत कार्य तीव्र बनाइरेको छ ।