तस्बिर श्रोत : मानव सेवा आश्रम ।

काठमाडौं । भनिन्छ, सडक जीवन बिताउनु कसैको रहर नभएर बाध्यता हो । अर्को भनाई यो पनि छ की आफ्नो स्वतन्त्रताको लागि मानिसले जे पनि गर्न सक्छ । 

के तपाई स्वतन्त्रताकै लागि सडक जीवन विताउन चाहानुहुन्छ ? तपाई चाहानु हुन्छ वा हुन्न त्यो तपाईको कुरा हो । तर, काठमाडौंका सडकमा केहि यस्ता सडक मानव भेटिएका छन्, जो स्वतन्त्रताकै लागि सडकमै जीवन बिताइरहेका छन् । 

दुई दिनअघि मात्र काठमाडौं महानगरपालिकाले सुरु गरेको सडक मानवमुक्त घोषणा अभियानमा भेटिएका कतिपय सडक मानव भनिएकाहरु बाध्यताले नभएर, रहर एवं स्वतन्त्रताका लागि नै सडक जीवन बिताई रहेको पाइयो । घर, परिवार र आफन्त हुँदाहुँदै स्वतन्त्रताका लागि सडकमा बस्ने धेरै मानिस भेटिए ।  

यसैबीच बाह्रखरीसँग कुरा गर्दै मानव सेवा आश्रमका सचिव सुमन वर्तौलाले दुई दिनको अवधिमा काठमाडौं महानगरभित्रका विभिन्न ठाउँबाट उद्धार गरिएका १ सय १ जना मध्ये कतिपय मानिस ब्यसहारा तथा दुःख पाएका छन् भने कतिपय मानिस स्वतन्त्रताको लागि सडकलाई  नै बाँस बनाइरहेका छन् ।

“कतिपय मानिस ब्यसहारा तथा दुःख पाएर सडकमा आएका छन् भने कतिपय स्वतन्त्र जीवनयापन गर्न चाहेका छन् । श्रम गरेर सडकमै सजिलोसँग सुत्न पाईन्छ भने किन कोठा लिएर बस्ने ? भन्ने खालमा मान्छे पनि भेटियो । सडकमा भेटिएकाहरु जोखिम अवस्थामा छन्,” उनले भने । 

मंसिर २९ गते २५ औं महानगर दिवसको अवसरमा कामपाले सडक मानवमुक्त अभियान घोषणा गरेसँगै दुई दिनमा एक सय भन्दा बढी सडक मानवको उद्धार गरिएको महानगरले जनाएको छ । मानव सेवा आश्रम, जिल्ला प्रशासन कार्यालय, नेपाल प्रहरी र महिला बालबालिका तथा जेष्ठ नागरिक मन्त्रालयसँगको समुन्वयमा कामपाले यो अभियानको घोषणा गरेको थियो । 

यसैबीच बाह्रखरीसँग काठमाडौं महानगरपालिका सहरी योजना आयोगकी सदस्य गुजेश्वरी श्रेष्ठले दुई दिनको  अवधिमा महानगरबाट एक सय भन्दा बढी सडक मानवको उद्धार गरेको जानकारी दिइन् । श्रेष्ठका अनुसार इन्द्रचोक, वसन्तपुर र कालिमाटीबाट ४ बच्चासहित १६ महिला र ८० जना पुरुषको उद्धार गरिएको छ । अभियान सुरु भएको पहिलो दिन कालीमाटीबाट १४ महिनाको बच्चा सहित एक महिलाको उद्धार गरिएको थियो । 

उद्धार गरिएकी ती महिला सडकमा आउनुको कारण भने अलि फरक पाइयो । परिवारले जिम्मेवारी नलिएको कारण बच्चा सहित सडकमा आएकी ती महिलालाई श्रीमानसहित परामर्श गरेर राम्रोसँग राख्छु भन्ने सर्तमा घर फर्काएको आश्रमले जनाएको छ । 

योसँगै दुई दिनको अवधिमा आश्रमले ३७ जना सडक मानव भनिएकालाई परामर्श दिएर घर फकाई सकेको छ । घर फर्केकाहरुले पुनः सडकमा नआउँने बाचा सहित दस्तखत गरेर आफन्तलाई जिम्मा दिइएको आश्रमले जनाएको छ ।