काठमाडौं । नेपाली कांग्रेसका उपसभापति विजयकुमार गच्छदारलाई आफूले पाएका ११ जना केन्द्रीय सदस्यको नामावली अन्तिम रुप दिन सकस परेको छ । तत्कालीन नेपाल लोकतान्त्रिक फोरमबाट कांग्रेसमा एकीकरण हुँदा केन्द्रीय सदस्य हुने आकांक्षीको संख्या धेरै भएकाले उनलाई अन्तिम नामावली टुंग्याउन सकस परेको हो ।  

तत्कालीन लोकतान्त्रिक फोरमका साढे तीन सयभन्दा बढी केन्द्रीय सदस्यमध्येबाट ११ जनामात्रै छान्नुपरेका कारण उपसभापति गच्छदारले निर्णय लिन नसकेका हुन् । तीन सय ५० भन्दा बढी केन्द्रीय सदस्यमध्येबाट ११ जना छान्न निकै गाह्रो भएको तत्कालीन लोकतान्त्रिक फोरमका एक पदाधिकारीले स्वीकार गरेका छन् ।  

दुई वर्षअघि सम्पन्न प्रतिनिधिसभा र प्रदेशसभा निर्वाचनको संघारमा आफूले नेतृत्व गरेको लोकतान्त्रिक फोरमलाई कांग्रेसमा समाहित गरेका गच्छदारलाई ‘गुण्डा नाइके’ को आरोप लाग्दै आएका गणेश लामा र पूर्वराज्यमन्त्री यशोदा लामालगायतले आफूलाई केन्द्रीय सदस्य बनाउनुपर्ने दबाब दिइरहेको स्रोतको दाबी छ । 

नेताहरु गणेश लामा, यशोदा लामा, देवी आचार्य, नेत्रबहादुर लिम्बू, चन्द्रबहादुर कार्की, नन्दु सरदारलगायतले आफूलाई केन्द्रीय सदस्य नबनाए असहयोग गर्ने चेतावनी दिएका कारण गच्छदारले केन्द्रीय सदस्यको नाम टुंग्याउन नसकेको बताइएको छ । उपसभापति गच्छदारले केन्द्रीय सदस्यका बारेमा निर्णय गर्न नसक्दा उनीसँगै कांग्रेसमा समाहित भएका ११ जना नेताहरु केन्द्रीय सदस्य हुने अवसरबाट वञ्चित हुन पुगेका छन् ।

गत असोज १० गते बसेको कांग्रेस केन्द्रीय कार्यसमिति बैठकले तत्कालीन लोकतान्त्रिक फोरमलाई ११ जना केन्द्रीय सदस्य दिने निर्णय गरेको थियो । बैठकले केन्द्रीय कार्यसम्पादन समिति गठन गर्दा समायोजनको प्रस्तावलाई ध्यानमा राखेर सहमतिका आधारमा समावेश गर्ने निर्णय गरेको थियो । यस्तै, केन्द्रीय विभाग र प्रदेश कार्यसमितिको गठन गर्दा समायोजनको प्रस्तावलाई ध्यानमा राखी सहमतिका आधारमा समावेश गरिने भएको छ । 

उक्त बैठकले विभिन्न जिल्लामा लोकतान्त्रिक फोरमका नेताहरूलाई उपसभापतिसहित अन्य पदमा मनोनीत गर्ने निर्णयसमेत गरेको थियो । काठमाडौं र पश्चिम नवलपरासीको हकमा भने आवश्यक परामर्श गरी निर्णय गर्ने बताइएको छ । गच्छदारले २०७४ असोज २९ गते आप्mनो पार्टीलाई कांग्रेसमा विलय गराएका थिए । 

उनले नेताहरु रामजनम चौधरी, भारतेन्दुकुमार मल्लिक, गोपाल दहित, योगेन्द्र चौधरी, मंगलसिंह थारू, जितेन्द्रनारायण देव, हरि न्यौपाने, महेश कोर्मोचा, नरसिंह सिद्दिकी, सुमित्रा थरुनी र शिवकुमार गुर्माछानेलाई पार्टीको केन्द्रीय समिति बनाउने मनस्थिति बनाएको तत्कालीन लोकतान्त्रिक फोरम स्रोतको भनाइ छ । 

उपसभापति गच्छदारले नेताहरुको नाम सिफारिस गरेलगत्तै केन्द्रीय सदस्यको रुपमा आधिकारिकता प्रदान गरिने कांग्रेसले जनाएको छ । कांग्रेस प्रवक्ता विश्वप्रकाश शर्माले मंसिर १४ गते हुन गइरहेको उपनिर्वाचनलगत्तै तत्कालीन लोकतान्त्रिक फोरमका नेताहरुको नाम केन्द्रीय सदस्यका लागि सिफारिस भएर आउने सम्भावना रहेको प्रतिक्रिया दिएका छन् । 

“पार्टीले तत्कालीन लोकतान्त्रिक फोरमलाई ११ जना केन्द्रीय सदस्य दिने निर्णय यसअघि नै गरिसकेको छ,” उनले बाह्रखरीसँग भने, “उपसभापति गच्छदारले उपनिर्वाचनलगत्तै नेताहरुको नामावली बुझाउनुहुन्छ ।”

यो पनि पढ्नुहोस्

कांग्रेस-लोकतान्त्रिक फोरम समायोजनः गणेश लामादेखि गीता राणासम्म केन्द्रीय सदस्य बन्दै

कांग्रेसमा आफ्नो ‘भाग’ दाबी गर्दै गच्छदार, संस्थापनइतर समूह भन्छ- मागेजति दिन मिल्दैन

गच्छदार समूहलाई ११ केन्द्रीय सदस्य, ६०० महाधिवेशन प्रतिनिधि

कांग्रेसमा गच्छदार रणनीति– प्रतिनिधि धेरै बनाउने, महाधिवेशनमा बार्गेनिङ !