डडेलधुरा । प्रधानमन्त्री केपी शर्मा ओलीले विकासको जिम्मा आफूले लिने बताएका छन् ।

डडेलधुराको स्याउलेमा नेपाल विद्युत प्राधिकरणको स्याउले १२३–३३–११ केभीको सबस्टेसनको उद्घाटन गर्दै प्रधानमन्त्री ओलीले सो कुरा बताएका हुन् । प्रधानमन्त्री ओलीले अघिल्लो पटक आफू प्रधानमन्त्री भएका बेला निर्माण सुरु भएको यो केन्द्रले यस क्षेत्रमा विद्युत् वितरण र व्यवस्थापन गर्ने बताए ।

“अब डडेलधुराबासीले चिन्ता लिनु पर्दैन,विकासको जिम्मा मेरो भयो,” प्रधानमन्त्री ओलीले भने, “तपाईँहरुको आवश्यकता के के छन् माननीयहरुमार्फत् पठाउनुहोस । पूरा गर्ने जिम्मा मेरो भयो ।” प्रधानमन्त्री ओलीले पश्चिम सेती परियोजना जसरी निर्माण हुने बताए ।
“म प्रधानमन्त्री हुँदाहुँदै पश्चिम सेती निर्माण हुन्छ,” प्रधानमन्त्री ओलीले भने ।

प्रधानमन्त्री ओलीले डडेलधुरा अब पछि परिरहनु उपयुक्त नहुने बताए । “डडेलधुरा विकासमा पछि पर्नु लाजमर्दो कुरा हो,” प्रधानमन्त्री ओलीले भने, “अब सिंगै सुदुरपश्चिम अगाडि बढ्छ । विकसित हुन्छ ।”