काठमाडौं । अराव केशवले सात वर्षअगाडि एउटा सपना देखे, वान सटमा चलचित्र खिच्ने र वल्र्ड रेकर्ड कायम गर्ने । सपना देख्न सजिलो हुन्छ तर, पूरा गर्न कठिन । अराज केशवलाई पनि त्यस्तै भयो । सपनालाई विपनामा परिणत गर्न कठिन भयो । उनी आफ्नो योजना अरुलाई सुनाउँथे र निर्माणका लागि सहकार्य गर्न आग्रह गर्थे । तर, उनको योजनालाई हावादारी भनेर सबैले उडाउँथे । तर पनि उनले आफ्नो योजनाको घाँटी निमोठेनन्, बरु बचाइरहे । 

 

त्यही सपना र योजनालाई साकार बनाउन आज उनी कम्मर कसेर लागेका छन् र घोषणा गरेका छन्, वान सट मुभी ‘जालो’ निर्माणको । उनीसँगै छन्, चर्चित संगीतकार मोहित मुनाल । मोहित र अराज केशव दुवैले सोमबार काठमाडौंको मण्डला थिएटरमा पत्रकार सम्मेलन गरेर चलचित्र निर्माणको घोषणा गरे । साँझ बानेश्वरस्थित आफ्नै स्टुडियोमा भेटिएका मोहित र अराज केशव आफ्नो ड्रिम प्रोजेक्ट सफल हुनेमा ढुक्क हुँदै बाह्रखरीसँग गफिए ।

 

“केही नयाँ गरेर देखाउनुपर्छ भन्ने लाग्थ्यो । सुरु–सुरुमा कुनै पनि नयाँ काम गर्दा सबैले पागलपन भन्छन्, हाम्रो समाज नै यस्तै छ,” मोहितले भने, “चुनौती मोलेर गरेपछि र सफल भएपछि सबै पछि लाग्छन्, हाम्रो चलन नै यस्तै छ ।”

 

हो, यही त हो चुनौती । हामीले मोल्न खोजेको चुनौती पनि यही हो । हामी ‘जालो’ र ‘जालो रिटन्र्स’ नामक दुइटा चलचित्र बनाउँदैछौं । यी दुवै चलचित्र एकै सटमा खिच्छौं । 

 

हामीसँग ५५ जना कलाकार छन् । उनीहरू अभिनय गर्दै जान्छन् । हामी त्यसलाई खिच्दै जान्छौं । ‘जालो’ सकिन्छ तर क्यामेरा अफ हुँदैन । सँगै ‘जालो रिटन्र्स’ सुरु हुन्छ र त्यो त्यही सटमा सकिन्छ । क्यामेरा अफ हुन्छ । कुनै दृश्य पनि दोहोर्याएर खिच्ने अवसर हुने छैन । मोसनको काममात्रै हुन्छ । साउन्डको कम भने हुन्छ । 

मोहित अगाडि थप्छन्, “हाम्रो चलचित्रमा मध्यान्तर पनि हुन्छ । तर, त्यहाँ ग्याप भने हुँदैन । मात्र बे्रक लेखिएको हुन्छ । चलचित्र सुरु भइहाल्छ । चार घण्टापछि हलबाट बाहिर निस्किने हो । तर, हामी दर्शकदाई बोरिङ फिल हुन भने दिँदैनौं । चलचित्र पूरै व्यावसायिक हुन्छ । नर्मल चलचित्रलाई भन्दा पनि धेरै बजेट लाग्नेछ । 

 

हामीले सुरुमा गरेको प्लानिङ पनि यही हो । यसमा कलाकारको संख्या पनि निकै धेरै हुनेछ । चलचित्र सुरु हुनुभन्दा पनि पहिले हामी सबै कलाकार क्लोज क्याम्पमा बस्नेछौं । यसले पनि खर्च बढाउँछ । हाम्रो चलचित्र ‘अब्जर्भ’ गर्न आउने गिनिज बुक अफ दि वल्र्ड रेकर्डसको टोली पनि आउँछ । उसको खर्च पनि हामीले नै बेहोर्नुपर्छ । 

सुरुमा त मलाई पनि लागेको थियो, दुई दिनका लागि क्यामेरा भाडामा लिउँला, दुई दिनका लागि प्राविधिक भाडामा लिउँला, खर्च नै धेरै लाग्दैन । तर, ठिक्क उल्टो भयो ।”  

 

‘फ्ल्यासब्याक’, रहस्य, द्वन्द्व, गीत र नृत्य आदि सबै समावेश गरिनेछ । व्यावसायिक भएकाले अरु चलचित्रभन्दा कम हुँदैन । त्योभन्दा राम्रो नै गर्ने प्रयासमा छौं । 

 

पहिलो, हाम्रो सात वर्षअघिको योजना र सपना हो । दोस्रो, हामीले नेपालबाट विश्वकै वान सट मुभी बनाउँदैछौं । तेस्रो, यो चलचित्र युट्युबमा राख्नेबित्तिकै विश्वले सर्च गर्छ । नेपाली चलचित्र भनेर थाहा पाउँछ । कलिउडको प्रमोसन पनि हुन्छ । ‘गिनिज बुक अफ वल्र्ड रेकर्ड’मा दर्ता भएपछि यसै पनि नेपाली चलचित्रका लागि राम्रो नै हुन्छ । 

 

५५ जना कलाकारले अभिनय गर्ने चलचित्रमा अनुपविक्रम शाही, आशिफ शाह, भानु प्रताप, मेनुका प्रधान, वर्षा सिवाकोटी, प्रकाश श्रेष्ठ, मुक्ताराम आचार्य र भीष्म जोशीले अभिनय गर्ने टुंगो लागिसकेको छ भने अन्य कलाकार पाइपलाइनमा छन् । 

 

चलचित्रको सुटिङ यही असोजमा सुरु हुँदैछ । यसका लागि ‘जालो’को निर्माण युनिटले गिनिज बुकलाई खबर पनि गरिसकेको छ । लोकेसन काठमाडौं नै छानिएको छ । चलचित्र यही वर्ष रिलिज गर्ने मोहितले बताए । चलचित्रको निर्माता मोहित मुनाल हुन् भने कार्यकारी निर्माता धनी गिरी रहेको चलचित्रमा कथा लेखन तथा निर्देशन अराज केशवले गर्नेछन् ।