काठमाडौ । अधिकांश कम्पनीको बोनस र हकप्रद सेयर घोषणा भएपछि बजारमा सेयर किन्नेको भन्दा बिक्री गर्नेको चाप बढदै गई बिहीबार सेयरको मूल्य ओरालो लागेको छ ।

बिहीबार सेयर बजारमा ४१ अंकले गिरावट आएर नेप्से परिसूचक १ हजार ६५८ मा सीमित भई २.४ प्रतिशत घटेको छ । एभरेष्ट बैंक र नेसनल लाइफ इन्स्योरेन्स कम्पनी लिमिटेडले धेरै बोनस सेयर र हकप्रद सेयर घोषणा गर्दा बजारमा सकारात्मक प्रभाव परेन । प्रायः सबै कम्पनीले लाभांश घोषणा गरेकाले  बजारमा किन्नेभन्दा बेच्नेको चाप बढेपछि सेयर बजार घटेको नेपाल स्टक ब्रोकर एसोसियएनका अध्यक्ष नरेन्द्र सिजापति बताउँछन् । “बिहीबार बजार धेरै घटेका कारण आइतबार पनि सुधार नहुने सम्भावना छ,” उनले भने, “आइतबार बजारले कस्तो ‘मुभ’ लिनेछ । यो त्यसैमा निर्भर हुन्छ ।” 

बिहीबार सबैभन्दा बढी एभरेष्ट बैंक, नेसनल लाइफ इन्स्योरेन्स कम्पनी, शिखर इन्स्योरेन्स कम्पनी र सिभिल बैंकको बढी सेयर कारोबार भएको छ । एभरेष्टको सेयर मूल्य १६६ रुपैयाँ घटेर प्रतिकित्ता ३ हजार ६२९ रुपैयाँमा कारोबार भएको छ । बिहीबार एभरेष्टको ५१ करोड ७० लाख ५२ हजार कित्ता सेयर कारोबार भएको छ । यस्तै नेसनल लाइफको प्रतिकित्ता ३ हजार ४१५ रुपैयाँमा १२ करोड ५० लाख १७ हजार, शिखरको प्रतिकित्ता ३ हजार ९४१ रुपैयाँमा ७ करोड ३ लाख ३२ हजार कित्ता सेयर किनबेच भएको छ । 

बिहीबार बैंक, होटल, विकास बैंक, जलविद्युत्, वित्त, बिमा र उत्पादनमूलक सबैको सेयर मूल्य घटेको छ । सबैभन्दा बढी बिमा समूहको सेयर मूल्य घटेको छ । बजार घटे पनि बिहीबार १ अर्ब ५० करोड ६४ लाख रुपैयाँ बराबरको सेयर काराबोर भएको छ । बजार घटेपछि लगानीकर्ताले एकै दिन झण्डै ४७ अर्ब रुपैयाँ गुमाएका छन् । बिहीबार सेयरको मूल्य घटेपछि बजार पुँजीकरण १८ खर्ब ४२ अर्ब ६४ करोडमा सीमित भएको छ । बुधबार बजार पूँजीकरण १८ खर्ब ८८ अर्ब रुपैयाँ थियो ।