काठमाडौं । कीर्तिमानी ग्रान्डस्लाम उपाधि विजेता राफेल नाडालले लोरेन्जो सोनेगोलाई ३–० को सेटमा हराउँदै विम्बल्डन टेनिसको चौथो चरणमा स्थान बनाउन सफल भएका छन् ।

पहिलो दुई खेलको तुलनामा उल्लेख्य सुधार गरेका नाडालले चौथो चरणमा स्थान बनाउने क्रममा इटालीका सोनेगोलाई ६–१, ६–२ र ६–४ को स्कोरमा हराए ।

तेस्रो सेटमा ४–२ को अग्रता लिएको अवस्थामा स्पेनका नाडालले सोनेगोलाई नेटमा बोलाएर केही संवाद गरेका थिए । खेलपछिको पत्रकार सम्मेलनमा नाडालले आफ्नो त्यो काम गलत भएको बताएका छन् । 

“मैले उसलाई नेटमा बोलाउनु हुँदैनथ्यो,’’ ३६ वर्षीय नाडालले भने, “मैले गल्ती गरेको स्वीकार गर्नुपर्छ । त्यसैले माफी माग्न चाहन्छु । यसमा मेरो गल्ती छ । कुनै समस्या छैन । मैले त्यसमा गल्ती महसुस गरेको छु ।’’

सोनेगोले आफ्नो पहिलो ब्रेक प्वाइन्टबाट एक अंक लिने क्रममा निकालेको आवाजबाट नाडाल निराश बनेका थिए । नाडालले अम्पायरसँग कुरा गरे । त्यसपछि नडालले सोनेगोलाई नेटमा बोलाएर कुरा गरेका थिए ।

“मेरो नियत उनलाई चिन्तित पार्ने वा दबाब दिने थिएन,’’ नाडालले भने, “खेलाडीहरूबीच केही कोड भाषाहरू हुन्छन् । मलाई लाग्यो कि उनले मलाई गिज्याएका छन् । त्यसका लागि मैले उनलाई नेटमा बोलाएर सोधेको थिएँ । त्यत्ति हो ।’’

त्यसपछि नाडालले आफ्नो वर्चस्व रहेको खेलमा पुनः नियन्त्रण कायम गरे । जित हासिल गरे । खेलपछि पनि नाडालले नेटमा हात मिलाएपछि पनि इटालियनसँग कुरा गरेका थिए ।

गए राति नै अर्को खेलमा अष्ट्रेलियाका निक किर्गियोसले चौथो वरीयताप्राप्त ग्रीसकास्टेफानोस सिटसिपसलाई स्तब्ध बनाए । किर्गियोसले विम्बल्डनको चौथो चरणमा स्थान बनाउने क्रममा सिटसिपसलाई ३–१ को सेटमा हराए । नाटकीय र प्रतिस्पर्धात्मक बनेको उक्त खेलमा अम्पायरले दुवै खेलाडीलाई पटक–पटक चेतावनी दिनुपरेको थियो ।

किर्गियोसले सिटसिपासलाई उक्साएका थिए । जसका कारण २३ वर्षीय सिटसिपसले दोस्रो सेट गुमाएपछि दर्शकदीर्घामा बल फालेका थिए । अस्ट्रेलियाका किर्गियोसलेपहिले पनि अश्लील शब्द प्रयोग गरेको भनी चेतावनी प्राप्त गरिसकेका थिए । सिटसिपासलाई त दुईपटक खेल भावनाविपरीत कार्य गरेको भनेर एक अंक पेनाल्टी दिइएको थियो ।

किर्गियोसले सिटसिपासलाई ६–७ (२/७), ६–४, ६–३ र ७–६(९/७) को स्कोरमा पराजित गरेका हुन् । २९ वर्षीय किर्गियोसले अब अमेरिकी ब्रान्डन नाकाशिमाविरुद्ध खेल्नेछन् । २० वर्षे नाकाशिमाले कोलम्बियाका ड्यानियल गालनलाई ६–४, ६–४ र ६–१ को स्कोरमा हराउँदै चौथो चरणमा स्थान बनाएका हुन् ।