राजनीति
काठमाडौं । अख्तियार दुरुपयोग अनुसन्धान आयोगका प्रमुख आयुक्त लोकमान सिंह कार्कीको घरमा सर्वोच्च अदालतका तामेलदारहरुले बुधवार पर्चा खडा गरी म्याद तामेलको प्रयास गरे पनि सफल हुन सकेन ।
कार्कीको घर पुरै भाडामा लागेको भन्दै म्याद तामेली नगरी टोली फिर्ता भएको हो । तामेलदार शम्भु खत्रीको नेतृत्वमा गएको टोलीले ३÷४ घण्टासम्म पर्खिँदा पनि वडा सचिव सरिता राई उपस्थित नभएपछि म्याद तामेल हुन नसकेको हो ।
हाजिर गरेर निस्किएकी वडा सचिव अबेरसम्म पनि नआएपछि सर्वोच्चका तामेलदार फिर्ता भएका हुन् । “बिहीबार फेरि जाने तयारी छ,” स्रोतले भन्यो,“बिहीबार पनि महानगरका कर्मचारीले असहयोग गरे भने उनीहरूलाई पनि कारवाही हुन्छ । म्याद तामेलीमा सहयोग गर्नु उनीहरुको कानुनी दायित्व हो । असहयोग गरेको पाइएमा उनीहरुको बारेमा सुनुवाई पनि गर्नुपर्दैन । सिधै कारवाही हुन्छ ।”
अधिवक्ता ओम प्रकाश अर्यालले अख्तियार दुरुपयोग अनुसन्धान आयोगका प्रमुख लोकमान सिंह कार्कीको नियुक्ति नै गलत भन्दै सर्वोच्चमा दायर रिटमा पुनः सुनुवाई हुने निर्णय सर्वोच्चको छ । त्यसपछि अख्तियार प्रमुख कार्की स–परिवार विदेशमा रहेपछि उनको घरमा म्याद(सूचना) टाँस गर्न सर्वोच्चबाट तामेलदार पुगेका थिए ।
“यदि सूचना टाँस गर्न असहयोग भैरह्यो भने पत्रपत्रिका, रेडियो र टेलिभिजनबाट पनि जानकारी गराउन सकिन्छ,” अर्यालले भने,“त्यो अवस्थामा पुग्नु भनेको थप बेइज्जती हुनु हो ।”
प्रकाशित मिति: बुधबार, असोज १९, २०७३ १८:४५
प्रतिक्रिया दिनुहोस्