राजनीति
काठमाडौं । प्रधानमन्त्री पुष्पकमल दाहालले राष्ट्रिय एकता र सार्वभौमिकताको विषयमा कुनै पनि दलसँग आफूले प्रतिस्पर्धा नगर्ने बताएका छन् । बिहीबारबाट राजधानीमा सुरु भएको माओवादी निकट पत्रकार संगठन ‘प्रेस सेन्टर नेपाल’को एकताको पहिलो महाधिवेशनलाई सम्बोधन गर्दै दाहालले राष्ट्रिय एकता र देशको सार्वभौमिकताबारे कुनै पनि पार्टीसँग प्रतिस्पर्धा नगर्ने बताएका हुन् । प्रधानमन्त्री दाहालले संविधान कार्यान्वयन गर्न सबै दल एकजुट हुनुपर्ने औंल्याए । प्रधानमन्त्री दाहालले आफ्नो सरकारले पत्रकारको पक्षमा काम गर्ने प्रतिबद्धता व्यक्त गरेका छन् ।
यसैगरी सूचना तथा सञ्चार मन्त्री राम कार्कीले पत्रकारको न्यूनतम पारिश्रमिक कार्यान्वयन गर्न आफू प्रतिबद्ध रहेको बताएका छन् । मन्त्री कार्कीले राजपत्रमा जारी भइसकेको हुनाले पत्रकारको न्यूनतम पारिश्रमिक जसरी पनि लागु गर्ने प्रतिबद्धता जनाए ।
अर्काे एक सन्दर्भमा मन्त्री कार्कीले सानो घटनालाई ठूलो बनाउने सन्दर्भमा हुँदै नभएको कुरालाई लेख्नेगरेको प्रती सचेत रहन पत्रकारलाई आग्रह गरे । उनले भने, “अहिले सार्वजनिक स्थानमा कुनै नेताले अर्काे नेतालाई गाली नगरे दर्शकको ध्यान तान्न नसकिने अवस्था आएको छ । पत्रकारितामा पनि यस्तो नहोस् कसैले कुनै समाचार लेख्दा आर्थिक लाभ पाएन त्यसैले लेखेन र लेख्यो भने केही पाएछ र लेख्यो भन्ने अवस्था नआओस् । पत्रकारले आफ्नो विश्वसनियता आफैले जोगाउनु होला ।”
९४ केन्द्रीय कार्यसमितिका लागि बिहीबारदेखि सुरु भएको सेन्टरको महाधिवेशन शुक्रबार सकिने सेन्टरले बताएको छ ।
प्रकाशित मिति: बिहीबार, असोज १३, २०७३ १६:४१
प्रतिक्रिया दिनुहोस्