सिन्धुपाल्चोक । प्रधानमन्त्री पुष्पकमल दाहाल ‘प्रचण्ड’ले शुक्रबार सिन्धुपाल्चोकको मेलम्ची खानेपानी आयोजनाको स्थलगत निरीक्षण गर्न पुगेका छन् ।

शुक्रबार सांसद एवम् पूर्वमन्त्री अग्निप्रसाद सापकोटा, नेपाल सरकारका कामु मूख्य सचिव टंकमणि शर्मासहित मेलम्ची पुगेका प्रधानमन्त्रीले आयोजनाको स्थलगत निरीक्षण गरेका हुन् ।

निरीक्षणपछि आयोजना गरिएको विशेष कार्यक्रमलाई सम्बोधन गर्दै प्रधानमन्त्रीले राष्ट्रिय गौरवका आयोजना समयमै सम्पन्न गर्न आयोजनाका कर्मचारीहरुलाई निर्देशन दिए । प्रधानमन्त्रीले भने, “म निरीक्षणका लागि भन्दा पनि अनुगमनका लागि आएको हुँ । राष्ट्रिय गौरवका आयोजना समयमै सम्पन्न हुनुपर्छ भन्ने सरकारको स्पष्ट धारणा छ । त्यसैले म आफैले महत्व दिएर भ्रमणमा आएको छु । मेरो निर्देशन छ, निर्धारित समयभन्दा पहिल्यै आयोजना सम्पन्न गरेर पुरस्कृत हुनुहोस् ।”

 

प्रधानमन्त्रीले विकास आयोजना छिटो सम्पन्न गर्ने संस्कारमा प्रतिस्पर्धा गर्न पनि कर्मचारीहरुलाई निर्देशन दिए । प्रधानमन्त्रीले भने, “हामीकहाँ काममा ढिलाई गर्नमा प्रतिस्पर्धा हुने गरेको छ । सरकार चाहन्छ, सबै आयोजनाहरु समयमै सम्पन्न गर्ने कुरामा प्रतिस्पर्धा गर्ने संस्कारको विकास होस, सरकारलाई समयमै काम सम्पन्न गर्ने कर्मचारीलाई पुरस्कृत गर्ने अवसर मिलोस् ।”

प्रधानमन्त्रीले सिन्धुपाल्चोक भूकम्प र प्राकृतिक प्रकोपबाट प्रताडित जिल्ला भएको भन्दै भूकम्प पीडितलाई राहत र पुनर्निर्माणको कामलाई सरकारले उच्च प्राथमिकतामा राखेको बताए । प्रधानमन्त्रीले भने, सत्तामा अब राजा महाराजा छैनन, हामी जनताकै बीचबाट आएका प्रतिनिधि हौं । जनताको पक्षमा काम गर्न पाउँदा मलाई विशेष गर्वको महशुस हुन्छ । भूकम्पपीडितको पक्षमा प्रभावकारी काम गर्न सरकार प्रयत्नशील छ ।” कार्यक्रममा सिन्धुपाल्चोकका सांसदद्वय अग्निप्रसाद सापकोटा र शेरबहादुर तामाङ लगायतका वक्ताहरूले मेलम्ची आयोजनाको प्रगति र राष्ट्रिय महत्वबारे आफ्नो धारणा राखेका थिए ।