site stats
बाह्रखरी :: Baahrakhari
ब्लग
Nabil BankNabil Bank
Sarbottam CementSarbottam Cement
Ghorahi CementGhorahi Cement
गृहमन्त्रीज्यू ! निर्मलाका हत्यारा खोज्ने सबै कांग्रेसीमात्रै हुन् र ? 

भनिन्छ, बुढेसकालको सहारा छोराछोरी । जवान छोराछोरीको लाश काँधमा बोकेर मसानघाट पुर्‍याउनु कुनै पनि आमाबाबुका लागि जीवनको सबैभन्दा ठूलो पीडा हो । त्यसमाथि बलात्कारपछि मारिएकी आफ्नी छोरी जलाएर फर्किएपछि न्याय माग्दा अवोध बालकको प्रहरीको गोलीबाट ज्यान गएपछि निर्मलाका आमाबुबाको मनमा कस्तो भावना पैदा भइरहेको होला ?

खुकुरीको चोट अचानोलाई मात्र थाहा हुन्छ भनेझैं निर्मला गुमाउँदाको पीडा र त्यसपछि न्यायका लागि प्रचण्ड गर्मीमा धाउँदाको सकस पन्त परिवारले व्यहोरेका छन् । जनताले वर्षौं लडेर ल्याएको गणतन्त्र होस् या लोकतन्त्र, यसका मालिक जनता नै हुन् । सिङ्गो नेपाल र अन्तर्राष्ट्रिय मिडियाको समेत ध्यान तानेको एक क्रुर घटना बनेको छ निर्मला हत्याकाण्ड । 

घटनाका बारेमा जसको विवेकले जे देख्यो, त्यही बोल्यो । निर्मला बलात्कार र हत्यामा संग्लन दोषीलाई कारबाही गर भनेर सडकमा निस्किएको जनताको जुलुसमाथि प्रहरीले गोली चलायो, सडकमै ढले शनि खुना । अन्य दर्जनौं घाइते छन् । न्याय माग्न सडकमा निस्किएका जनतामाथि गोली चलाइयो लोकतान्त्रिक भनिने सरकारका रक्षकहरुबाटै । 

Agni Group

निर्मला हत्याकाण्डमा प्रहरीको बयान नै अन्तिम सत्य मान्ने तर हजारौं जनताको प्रहरीमाथिको अविश्वासलाई घूसपैठ, अराजक तत्व देख्ने, न्यायको मागका लागि गोली थाप्न तयार हुने जनतालाई कांग्रेसको समूह देख्ने ने क पाका नेता भीम रावल हुन् वा बलात्कारीको पक्षमा आन्दोलन गरे भनेर हिंसा भड्काउने गृहमन्त्रीका राजनीतिक सल्लाहकार सूर्य सुवेदी । यो बीचमा आएका यी दुई अभिव्यक्तिको विषयमा सरकार र ने क पा किन मौन छ ? योबीचमा गृहमन्त्रीसँग आईजीपी सर्वेन्द्र खनालले भेटे र प्रहरीले गरेको अनुसन्धान नै अन्तिम सत्य भएको ब्रिफिङ गरे । गृहमन्त्रीले त्यही माने । तर, गृहमन्त्रीज्यू ! एकपटक तपार्इंले किन सोच्नुभएन कि सडकमा प्रहरीविरुद्ध हजारौं जनताको जुलुस किन उर्लियो ? किन प्रहरीले घटनाको अनुसन्धान निष्पक्ष गरेन भनेर आवाज उठ्यो ? तपाईं नै हो, जनता मालिक हो भनेर सडकदेखि सिंहदरबारसम्म कुर्लने, तर आज तिनै मालिक भनिएका जनताका छोरी बलात्कृत भएर मारिइन् । अनि न्याय चाहियो भनेर सडकमा उर्लंदा कांगे्रस कसरी देख्नुभो ? एकपटक सिंहदरबार बाहिर आएर जनता बनेर हेर्नुस्, जनतामा तपाईंप्रति बढ्दै गएको आक्रोश र घट्दै गएको विश्वासको तह कस्तो छ । तपाईं जनताको गृहमन्त्री कि प्रहरीको मात्रै ? कञ्चनपुरको सडकमा निस्किएका जनता के अपराधी थिए ? के राज्यविरुद्ध विद्रोह गरिरहेका थिए वा आतंकवादी थिए ? 

निर्मला हत्याकान्डका ३२ दिन

Global Ime bank

गत साउन १० गते पढ्न साथीको घरमा गएकी निर्मला पन्तको भोलिपल्ट उँखुबारीमा शव फेला परेको थियो ।

निर्मलाकी आमा छोरी खोज्न १० गते नै रोशनी र वविताको घरमा जाँदा भित्र प्रवेश गर्नसमेत दिइएन । जुन घर छोरीकी साथीको घर थियो । भित्र प्रवेश गर्न नदिने पनि छोरीकी साथी र उनकी दिदी नै हुन् ।

अर्को दिनसम्म पनि प्रहरीले घटनाका बारेमा चासो नदिएपछि गाउँलेसँगै पुगेकी निर्मलाकी आमालाई बबिताले ‘निर्मलाको साइकल भेटिएको भए शव पनि त्यहीँ होला’ भनेकी निर्मलाकी आमा बताउँछिन् । त्यति हुँदा पनि बम दिदीबहिनीलाई प्रहरीले किन अनुसन्धानको दायरामा ल्याउन सकेन ?

छोरी हराएको सूचना दिँदा पनि ‘अहिले राति भयो भोलि फोटो लिएर आउनू अनि खोजौँला’ भनेर टार्ने वडा प्रहरी कार्यालयका प्रहरी निरीक्षक किन कारवाहीको दायरामा आउन सकेनन् ? कि उनलाई पहिले पहिले नै ‘माथिबाट निर्देशन’ आइसकेको थियो ?

‘हाइप्रोफाइल’ का परिवार संलग्न भएको आशंकामा प्रहरी नै यसरी पन्छिन खोजेको स्थानीयको आशंका छ । जुन कुरा स्थलगत रिपोर्टिङका क्रममा हामीले पनि पाएका थियौं ।

तर प्रहरीले ‘सधैं भीडले भनेको किन मान्ने ?’ भन्ने प्रहरी नेतृत्वसम्मका क्रियाकलाप र अभिव्यक्तिले जनताको न्याय मार्ने प्रयास गरेको देखिन्छ ।

यहाँसम्मकी कञ्चनपुरबाट निर्वाचित जनप्रतिनिधिसमेत पीडित निर्मलाको घरमा पुग्न सकेका छैनन् ।

सीआईबीका डीएसपीलाई किन छुट ?

घटनाको अनुसन्धान गर्न केन्द्रीय अनुसन्धान व्युरो (सीआईबी)ले डिएसपी अंगुर जिसीको नेतृत्वमा टोली कञ्चनपुर पठायो । टोली झण्डै ३ हप्ता कञ्चनपुर बस्यो । घटनाको २४ दिनपछि मानसिक सन्तुलन गुमाएका भनिएका दिलिप विष्टलाई सीआईबी र कञ्चनपुर प्रहरीको टोलीले संयुक्त रुपमा सार्वजनिक गरे । विष्टलाई नै निर्मला हत्याको मुख्य अभियुक्त बनाइएपछि नागरिकमात्रै होइन, निर्मलाका परिवार नै अचम्मित भए । सीआईबीजस्तो विश्वासिलो निकायका डीएसपीले कसरी यस्तो अनुसन्धान गरे ? के कञ्चनपुरका एसपी डिल्लीराज विष्टलाई कानुनको डण्डा चलाइँदा सीआइबीका डिएसपी अगुंर जिसीलाई छुट दिन मिल्छ ? 

अझ पक्राउपछि ११ दिन गोप्य रुपमा थुनामा राखेका चक्र बडुकै बयानअनुसार सीआईबीबाट आएका भनिएको सिभिल ड्रेसका प्रहरीले बढि यातना दिएका थिए रे । के उनलाई पनि गोप्य रुपमा ‘नक्कली मुठभेड’ को तयारी प्रहरीले गरेको थियो ? होइन भने पक्राउ गरिएका व्यक्तिलाई चरम यातना किन दिइयो ? र घटना गोप्य राख्ने काम प्रहरीबाटै किन भयो ? यसको जवाफ अहिलेसम्म आउन सकेको छैन ।

न्याय माग्दा कसरी हुन्छ राजनीति ? 

राजनीतिक एजेण्डा थियो भन्ने मान्न सकिन्छ कञ्चनपुर घटनामा राजनीति भयो । प्रतिपक्षी दलको नाताले कांग्रेसले मौकामा चौका हान्न खोज्यो होला तर सडकमा निस्किएको जनसागर कुनै दलको थिएन बरु न्यायका निम्ति उर्लिएको सुनामी थियो । जनताको त्यो मौनतापछि निस्किएको सुनामी छालले क–कसलाई कुन किनारमा पुर्याउने हो, निष्पक्ष छानबिन भएको अवस्थामा प्रष्ट होला । घटनाको वास्तविकतामा नगई ने क पाका जिम्मेवार नेताले कांग्रेसले आन्दोलन उचालिरहेको र हिंसा भड्काइरहेको अभिव्यक्ति दिए । हत्याराको पहिचान गरेर कारबाहीको माग जनस्तरबाट चर्किएको बेला त्यो अभिव्यक्ति किन दिए ? गृहमन्त्रीकै सल्लाहकारले सामाजिक सञ्जालमा किन गैरजिम्मेवारपूर्ण अभिव्यक्ति दिए ?

जब राजनीतिमा अपराध र अपराधमा राजनीति हुन्छ, त्यहाँ जनताले न्यायको अपेक्षा गर्नु भनेको आकाशको फल आँखा तरी मर भनेझैं हो । सत्तामा रहेकाहरुले न्यायका लागि उर्लेको लहरलाई कांग्रेसको जुलुस देख्ने र त्यहीअनुसारका अभिव्यक्ति दिने प्रवृत्तिले कञ्चनपुर घटनालाई थप चर्काउन मद्दत गरेको देखिन्छ । न्यायको माग गर्नेहरुलाई जसरी पनि गलाउने, सत्ता र शक्तिको दुरुपयोग गर्दै बन्दुकबाटै ठिक पार्न खोज्ने सत्तासीनहरुको चरित्रका कारण निर्मलाले न्याय पाउन सकेकी छैनन् । बरु एउटाका लागि न्याय माग्दा अर्कोले ज्यान गुमाउनुपर्यो । सँगसँगै प्रतिपक्षीले पनि सरकारलाई वैधानिक बाटोबाट दबाब दिन सकेन । घटना घटिसकेपछि, मान्छे मरेपछि मात्रै जाग्ने सत्ता चरित्र होस् वा प्रतिपक्षको भूमिका दुवै गैरजिम्मेवार छन् । 

राहत होइन, न्याय चाहियो

सरकारले पीडित परिवारलाई राहत दिने घोषणा गरेको छ । स्थानीय तहले पनि राहतको घोषणा गरेका छन् । पीडित परिवारले भने राहत होइन, न्यायमा जोड दिएका छन् । निर्मलाको इज्जत र जिन्दगी १० लाखले फिर्ता ल्याउन सकिँदैन । राज्यले राहत दिनुपर्छ तर न्यायसहितको । फेरि पनि कुनै पनि नेपाली चेली ‘निर्मला’ हुन नपरोस् । 

अपराधमा संग्लनहरुको असली अनुहार र भरपर्दो प्रमाण जनताको अगाडि सार्वजनिक होस् ताकि फेरि–फेरि ‘हाम्रा निर्मलाहरु’ बलात्कारपछि हत्याको शिकार बन्ने अवस्था कहिल्यै नआओस् । हाम्रा चेलीहरु, अधिकारकर्मीहरु बलात्कारीलाई कारवाहीको माग गर्दै माइतीघर मण्डलमा अर्धनग्न अवस्थामा आउनु नपरोस् । सरकार पनि बेलैमा सचेत होस् । 

बलात्कारपछिको हत्यामा संलग्न नभएका निर्दोष व्यक्ति जेलमा बस्ने र बलात्कारी समाजमा अनुहार देखाएर हिँड्न सक्ने अवस्था फेरि नआओस् । प्रहरीले निष्पक्ष अनुसन्धानपछि ‘दुधको दुध, पानीको पानी’ बनाइदियो भने वास्तवमा निर्मला र उनको परिवारले न्याय पाएको ठहरिनेछ । 
 

NIBLNIBL
प्रकाशित मिति: मंगलबार, भदौ १२, २०७५  ०९:१७
Sipradi LandingSipradi Landing
worldlinkworldlink
प्रतिक्रिया दिनुहोस्
Ncell Side Bar LatestNcell Side Bar Latest
Bhatbhateni IslandBhatbhateni Island
Kumari BankKumari Bank
Shivam Cement DetailShivam Cement Detail
Maruti cementMaruti cement
सम्पादकीय
ICACICAC