देश
काठमाडौं । नेपाल स्रष्टा समाजले स्रष्टा एवं मानवअधिकारकर्मी दुर्गा घिमिरेलाई योगमाया नारी स्रष्टा सम्मान प्रदान गरेको छ । नवौं वार्षिक साधारण सभाको क्रममा बिहीबार राजधानीमा आयोजना गरेको ‘विशेष साहित्यिक कार्यक्रम’ मा नेपाल प्रज्ञा प्रतिष्ठानका कूलपति गंगाप्रसाद उप्रेतीले घिमिरेलाई सम्मानपत्र प्रदान गरेका हुन् । घिमिरेलाई समाजका अध्यक्ष पवन आलोकले सम्मानवापत २५ हजार रुपैयाँ नगद प्रदान गरेका थिए ।
समाजका अध्यक्ष आलोकले घिमिरे २०३३ सालदेखि सामाजिक सेवामा संलग्न भई २०४४ सालदेखि हिंसापीडित महिलाका काममा लागि परेको बताए । समाजले सातौं नारी स्रष्टाका रुपमा घिमिरेलाई साहित्य लेखन र समाज परिवर्तनमा योगदान पु¥याएको भन्दै सम्मान गरेको समाजका सदस्य प्राडा गोविन्दमान सिंह कार्कीले बताए । कार्यक्रममा कूलपति उप्रेतीले आलोककै यात्रा उपन्यास ‘अरुण एक्सप्रेस’ र डा. नवराज सुब्बाको गीतगजलको संग्रह ‘मन र माटो’ को विमोचन गरेका थिए । समीक्षक महेश पौडयालले अरुण एक्सप्रेसले पाठकलाई नयाँ स्वाद दिने दाबी गरे भने अर्का समीक्षक ध्रुव मधिकर्मीले गीत र गजलले जीवन र जगतलाई समेटेको बताए । कार्यक्रममा वरिष्ठसाहित्यकार परशु प्रधानले समाजले नौ वर्षदेखि निजी क्षेत्रबाटै भए पनि अन्य देशसँग पनि साहित्यिक आदानप्रदान गरिरहेको र कृति प्रकाशनमा पनि महत्वपूर्ण योगदान पु¥याएको बताए ।
समाजको नवौं साधारण सभाले आलोकको अध्यक्षतामा ११ सदस्यीय कार्यसमिति छनोट गरेको छ । सर्वसम्मतबाट छनोट भएका पदाधिकारीमा विधान आचार्य उपाध्यक्ष, चेतनाथ कँडेल हरित महासचिव, पुष्पा खनाल कोषाध्यक्ष, तारा सुवेदी सचिव र प्रा डा गोविन्दमान सिंह कार्की, गोपीकृष्ण ढुंगाना, जानु धिताल, आर्या शाह, गोकुल अधिकारी र नवराज तिमिल्सिना सदस्यमा छन् ।
प्रकाशित मिति: शुक्रबार, भदौ ३१, २०७३ १६:५६
प्रतिक्रिया दिनुहोस्