राँझा । बाँके र बर्दियामा चोरी धन्दामा संलग्न दुई भारतीय नागरिकलाई बाँके प्रहरीले शनिबार हतियारसहित पक्राउ गरेको छ ।
भारतको रुपैडिहास्थित निबिया निवासी २६ वर्षीय डल्लु मनिहार र बाबागन्ज निवासी २८ वर्षीय निजामुद्दिन कवडियालाई जानकी गाउँपालिका–५, बुढियागाउँबाट एकथान कटुवा पेस्तोलसहित नियन्त्रणमा लिएको जिल्ला प्रहरी कार्यालय बाँकेका प्रवक्ता प्रहरी नायब उपरीक्षक मधुसूदन न्यौपानेले जानकारी दिए ।
उनका अनुसार ती दुईजना बाँके र बर्दियामा डाँका तथा चोरी घटनामा संलग्न रहेका थिए । गत पुस २९ गते बर्दिया, शीतलाबजारका परशुराम सार्कीको घरमा राति पेस्तोल देखाएर तीन लाख ३५ हजार रुपैयाँबराबरको नगद र सुन लुटेका उनीहरूले यही माघ १७ गते बाँके, खजुरा गाउँपालिका–४, डिगाउँ निवासी सुन व्यवसायी हरिप्रकाश विकको घरबाट ५० हजार रुपैयाँ नगद, साढे तीन तोला सुन र २२० सीसीको पल्सर मोटरसाइकल चोरी गरेका थिए ।
इलाका प्रहरी कार्यालय खजुराखुर्दबाट खटिएको प्रहरी टोलले एकथान कटुवा पेस्तोलसहित उनीहरूलाई पक्राउ गरेको हो । उनीहरूलाई जिल्ला प्रहरी कार्यालयमा राखेर थप अनुसन्धान भइरहेको प्रहरी नायब उपरीक्षक न्यौपानेले बताए । रासस
