काठमाडौं । सरकारका प्रवक्ता एवं सञ्चार तथा सूचना प्रविधि मन्त्री ज्ञानेन्द्र बहादुर कार्कीले सर्वदलीय बैठक नबोलाइएको बताएका छन् । प्रधानमन्त्री शेरबहादुर देउवाले आज बिहानका लागि सर्वदलीय बैठक बोलाएको समाचारहरु आइरहेका बेला मन्त्री कार्कीले भने, “सर्वदलीय बैठक बोलाइएको छैन ।  बोलाउने विषयमा कुरा पनि भएको हैन ।”

उनले बाह्रखरीसँग भने, “सर्वदलीय बैठकको कुरै आएको छैन । कसरी त्यो समाचार आयो म अचम्ममा छु । हिजो प्रेस व्रिफिङमा मैले जति भनेँ त्यति मात्रै हो ।” 

यद्यपि, शुक्रबार साँझ प्रधानमन्त्री सचिवालय स्रोतले भने आज बिहान ९ः३० बजेलाई बैठक बोलाइएको जानकारी दिएको थियो । तीन तहको चुनाव र त्यसमा देखिएको कानुनी संकटका विषयमा छलफल हुने भनिएको थियो । 

तर, प्रधानमन्त्री सचिवालय र मन्त्रीबीच कुरा बाझिएको छ । यसैबीच, नेकपा एमालेले पनि प्रधानमन्त्रीको सचिवालयले बैठकबारे कुनै जानकारी नआएको बताएको थियो । 

बालुवाटार स्रोतले पहिला कानुनविद्हरुसँग कानुनी जटिलताको विषयमा परामर्श गर्ने र त्यसपछि मात्रै सर्वदलीय बैठक बोलाउने बताएको छ । सरकार कानुनविद्हरुको सुझाव लिएर अगाडि बढ्ने निर्णयमा पुगेको छ ।