काठमाडौं । पाकिस्तानले बंगलादेशसँगको दुई टेस्ट खेलको सिरिज क्लिन स्विप गरेको छ । पाकिस्तानले दोस्रो टेस्ट खेलमा आठ रनको इनिङ अन्तरले जित निकालेको हो ।
दुई देशबीचको सुरुवाती तीन दिन वर्षाले प्रभावित बनेको टेस्टमा पाकिस्तानले चौथो र पाँचौँ दिन उत्कृष्ट प्रदर्शन गर्यो ।
पाँचौँ दिन बंगलादेश पहिलो इनिङमा ८७ रनमा अलआउट भएपछि फलोअनमा परेको थियो । फलोअनमा परेको बंगलादेश दोस्रो इनिङमा ८४.४ ओभरमा २०५ रनमा अलआउट भयो ।
बंगलादेशका लागि सकिब अल हसनले ६३ रन बनाए । बंगलादेशका लागि मुश्फिकुर रहिमले ४८ रन बनाए । लिटन दास ४५ रनमा आउट भए ।
पाकिस्तानका लागि डेब्यू खेल खेलेका स्पिनर सजिद खानले ४ विकेट लिए । सजिदले पहिलो इनिङ्समा ८ विकेट लिएका थिए । शाहिन शाह अफ्रिदी र हसन अलीले २–२ विकेट लिए । बाबर आजमले १ विकेट लिए ।
दोस्रो इनिङमा बंगलादेश ३२ ओभरमा ८७ रनमा अल आउट भएको थियो । पाकिस्तानले पहिलो इनिङमा ९८.३ ओभरमा ३०० रन बनाउँदै ४ विकेट गुमाएको अवस्थामा समाप्तिको घोषणा गरेको थियो ।
वर्षाको कारण पहिलो दिनको खेल हुन सकेन । दोस्रो दिन ६.२ ओभरखेल हुँदा तेस्रो दिन खेल भएन । पहिलो खेलमा पाकिस्तान ८ विकेटले विजयी भएको थियो ।
पाकिस्तानले अब डिसेम्बर १३ तारिखबाट वेस्ट इन्डिजसँग ट्वान्टी–२० र एकदिवसीय सिरिज खेल्नेछ ।