सौराहा । नेकपा (माओवादी केन्द्र)तिर नलागी नेकपा (एमाले) रोजेका नेताहरू संकटमा परेका छन् । चितवनमा जारी पार्टीको १०औँ महाधिवेशनबाट नेतृत्वमा पुग्न उनीहरूलाई समस्या परेको हो ।
एमालेभित्र पदका आकांक्षीको व्यवस्थापनमा अध्यक्ष केपी शर्मा ओलीलाई सकस परेपछि पूर्वमाओवादी नेताहरू अन्योलमा परेका हुन् । अध्यक्ष ओली यति बेला होटेल पार्क सफारी रिसोर्टमा बसेर आफूनिकट नेताहरू र पदका आकांक्षीहरूसँग छलफल गरिरहेका छन् ।
आज पूर्वमाओवादीका नेताहरू टोपबहादुर रायमाझी, लेखराज भट्ट, प्रभु साहलगायतले ओलीलाई भेटेका थिए । ओलीलाई भेटेपछि उनीहरूमा आशाभन्दा निराशा बढेको छ ।
एक नेताका अनुसार भेटमा ओलीले ‘एमालेका नेताहरूलाई मिलाएपछि मात्र तपाईंहरूको पालो आउँछ’ भन्दै जवाफ दिएका थिए । “पहिले यता मिलाउँछु अनि तपाईं–हामी बसेर कुरा गरौँला,” ती नेताले ओलीको भनाइ उधृत गर्दै बाह्रखरीसँग भने ।