नयाँदिल्ली । भारतको महाराष्ट्रमा आउँदो जुन १ तारिखसम्मका लागि ‘लकडाउन’को अवधि बढाइएको छ ।
अन्य राज्यबाट आउनेहरुका लागि नेगेटिभ पीसीआर रिपोर्ट अनिवार्य गर्दै महाराष्ट्र सरकारले जुन १ बिहान ७ बजेसम्म लकडाउन अवधि बढाएको भारतीय सञ्चारमाध्यमले जनाएको छ । बुधबार बसेको मन्त्रिपरिषद् बैठकमा संक्रमण बढेकोमा चिन्ता व्यक्त गर्दै अधिकांश सदस्यहरुले मे ३१ सम्म लकडाउन बढाउनुपर्ने धारणा राखेका थिए ।
महाराष्ट्रमा पछिल्लो समय कोरोना संक्रमणबाट ज्यान गुमाउनेहरुको संख्या बढिरहेको छ । पछिल्लो २४ घण्टामा यो राज्यमा ४६ हजार ७८१ नयाँ संक्रमित थपिएका छन् भने ८१६ संक्रमितको मृत्यु भएको बताइएको छ । हालसम्म यस राज्यमा ५२ लाख २० हजार बढी कोरोनाभाइरसबाट संक्रमित भएका छन् भने मृतकको संख्या ७८ हजार ७ पुगेको छ ।
मे १४ देखि अप्रिल २० सम्म मृत्युदर ०.६ प्रतिशत रहेको महाराष्ट्रमा यो दर अप्रिल २१ देखि अप्रिल २७ सम्म बढेर १.१४ प्रतिशत पुगेको छ । मंगलबार मृतकको संख्यामा थोरै कमी आए पनि बुधबार पुनः बढेको बताइएको छ ।
मंगलबार ५१ संक्रमितको मृत्यु भएको थियो भने बुधबार ६६ संक्रमितको मृत्यु भएको छ । यद्यपि, यीमध्ये ५० प्रतिशतमा कोरोनाभाइरस संक्रमण हुनुपहिले नै अन्य रोग लागेको थियो ।