दाङ । विद्युतको फिडरलाइन जडान भएसँगै घोराही उपमहानगरपालिका वडा नम्बर ३ झिङ्नीस्थित बन्द अवस्थाको अक्सिजन प्लान्टबाट फेरि उत्पादन सुरु गर्ने तयारी गरिएको छ । 

बुधबारदेखि नै उद्योगमा फिडरलाइन जोड्ने काम सुरु भइसकेको सञ्चालक भरत पौडेलले जानकारी दिए । फिडरलाइन जोड्न काम पुरा भएर बिहीबार रातिदेखि नै अक्सिजन उत्पादन सुरु हुने र दैनिक उद्योगबाट एकसय २०-३० सिलिन्डर ग्यास उत्पादन गर्न सकिने पौडेलले बताए ।

“हामीले पहिले निजी खर्चमा १५० केभीएको ट्रान्सफर्मर जडान गरेर उत्पादन गर्दै आएका थियौं,” पौडेलले भने “तर, यसपाली फिडरलाइनका लागि सरकारले नै आफैँ छुट्टै आफ्नै ट्रान्सफर्मर र अन्य उपकरण ल्याएर जोडिदिएको छ ।”

२०७३ सालमा स्थापना भएको दाङ अक्सिजन उद्योग प्रालिले दुई वर्षसम्म उत्पादन गरेको थियो । तर पछि विद्युत आपूृर्तिमा भएको समस्या भएपछि तीन वर्ष यता उत्पादन बन्द भएको थियो ।

करिब करिब चार करोडको लगानीमा स्थापना गरिएको उद्योग बन्द भएपछि अक्सिजनका लागि अन्य जिल्लामा निर्भर हुनुपरेको थियो । 

तर, अहिलेको कोरोना महामारीमा अस्पतालहरूमा अक्सिजनको अभाव हुन थालेपछि प्रमुख जिल्ला अधिकारी दीर्घनारायण पौडेलको सक्रियतामा उद्योगलाई पुनः सञ्चालनमा ल्याउन लागिएको हो । पौडेलकाअनुसार महामारील सकिएपछि फेरि हाल जडान गरिएका सबै सामग्री निकालेर लैजाने सहमति भएको छ ।

दाङमै अक्सिजन उत्पादन हुन थालेपछि अब जिल्लाका अस्पतालहरूमा अक्सिजनको आपूर्तिमा सहज हुने अपेक्षा गरिएको छ । 

• #काेराेना कहर
• #अक्सिजन