बाह्रखरी
भर्खरै
sticky  ncell
Samsung
Daraz
British college
Samsung
Daraz
British college
साहित्य र कला प्रतिक्रिया दिनुहोस्
Jagadamba Group
Jagadamba Group
दीपक–दीपा र मुन्द्रे विवाद दीपक–दीपासँग भेट भइरहन्छ तर विवादबारे कुरै हुँदैन ‘एउटा रोल छ आएर खेल्देऊ भने खुसी भएर काम गर्छु’
Godraj nepal
Godraj nepal
नरेश फुयाँल
बाह्रखरी - नरेश फुयाँल बुधबार, चैत २५, २०७७
Laxmi Bank
Laxmi Bank

काठमाडौं । हास्य कलाकार जितु नेपाल र दीपाश्री निरौला तथा दीपकराज गिरीबीच ‘मुन्द्रेको कमेडी क्लब’को अध्यक्ष परिवर्तनलाई लिएर बढेको विवाद समाधानतर्फ अगाडि बढ्न सकेको छैन । यस वर्षको होलीलाई लक्षित गर्दै सार्वजनिक गरिएको होली गीतमा ‘छक्का पञ्जा’ युनिटका अधिकांश कलाकार देखिए । तर, जितु उक्त गीतको भिडियोमा अटाएनन् । यसले उनीहरुबीचको विवाद समाधान नभएको स्पष्ट पार्छ  । स्वयं जितु पनि चिसिएको सम्बन्धमा सुधार नआएको स्वीकार गर्छन् ।

“होलीको गीत छायांकन हुँदै छ भन्ने मलाई थाहा थियो । त्यसको केही दिनअगाडि दीपा दिदीसँग भेट पनि भएको थियो । तर, उहाँले मलाई बोलाउनु भएन । बोलाउनु हुन्न भन्ने मलाई थाहा पनि थियो,” जितु भन्छन्, “कमेडी क्लबको अध्यक्षको हेरफेरले असर गरेजस्तो लाग्छ । मलाइ यो स्वाभाविक लागेको छ । कारण मैले धोका दिएँ भन्ने उहाँहरुको बुझाइ छ । उहाँहरुलाई मैले धोका दिएको बुझाइ भएपछि उहाँहरुबाट मैले त्यो अपेक्षा गर्नु पनि हुँदैन ।”

हेरफेर आवश्यक थिएन भन्ने दीपक–दीपाको बुझाइ थियो । प्रायोजकले दोस्रो सिजनमा अध्यक्ष फेरौँ भनेर जितुलाई भन्यो । उनले धेरै केही नसोची हुन्छ भन्दिए । त्यही नै दशकौँ लामो सम्बन्ध चिसिनुको मुख्य कारण बन्यो । “उहाँहरुलाई शतप्रतिशत जितुकै चाहना र योजना अनुसार निकाल्यो भन्ने छ । तर, म प्रायोजकका कारण बाँधिएको थिएँ,” जितु भन्छन्, “तर, मैले प्रायोजकसँग अडान नलिएको चाहिँ हो । सायद, म अलि स्वार्थी भएँ । त्यसैले आयोजकले भनेपछि मैले अडान लिइनँ । तर, मेरो मात्रै कार्यक्रम थिएन कि एडभरटाइजिङ एजेन्सीको पनि थियो । कि एडभरटाइजिङ एजेन्सीले मलाई घान हाल्ने र मैले कि एडभरटाइजिङ एजेन्सीलाई घान हाल्ने काम भइरहेको छ ।”

Agani Group

आफूले हतारमा निर्णय लिँदा अहिलेको अवस्था आएको उनको भनाइ छ । जितुले अन्तिम समयमा आएर कमेडी क्लबको अध्यक्ष परिवर्तन गरिएको भन्दै ‘यतिञ्जेल सहकार्य गरिदिनुभएकोमा धन्यवाद’ भनेका थिए । ‘छायांकन हुन लागेको छ, तयारी गर्दै गर्नू’ भनेपछि उनले अन्तिममा आएर दीपाश्रीलाई अध्यक्ष परिवर्तन गरिएको भनेका थिए । यसले यति ठूलो रुप लेला भन्ने जितुले सोचेकै थिएनन् । “मैले सामान्य सोचेको कुरा उहाँहरुलाई अनपेक्षित भइदियो । पछि मैले मिलाउँछुभन्दा पनि त्यो सम्भव भएन,” जितु भन्छन् ।

दीपकराजको चित्त दुःखाइ पनि यसमै हो । “अघिल्लो दिन भोलि दिउँसो छायांकन छ भनेर बोलाइयो । तर, अचानक राति तपाईं आउनु परेन, हजुरको ठाउँमा अरुलाई नै राखियो भनेर फोन आयो । यसमा रातारात परिर्वतन गर्नुपर्ने केही कारण थिएन । यसमा हाम्रो थोरै असन्तुष्टि हो,” दीपक भन्छन्, “दीपाजी नै सधैँ त्यहाँ हुनैपर्छ भन्ने छैन । तर, एकछिनमा आऊ, एक छिनै नआऊ भन्नु चाहिँ राम्रो होइन । यसमा बसेर सल्लाह गरेर नै योपटक तपाईं नबस्नु होला भनेर भन्न सकिन्थ्यो ।” उनी जितुको यो निर्णयलाई ‘नराम्रो निर्णय’ भन्छन् । 

sarbottam cement

किन एजेन्सीसँग अडान लिएनन् जितुले दीपाश्रीलाई राख्न ?
राजेश हमालबारेबोल्दा दीपाश्रीले दर्शकको चर्को आलोचना खेप्नु परेपछि ‘मुन्द्रेको कमेडी क्लब’मा पुनः उनलाई राख्दा शोले नै गाली खाने भयले उनको ठाउँमा करिष्मालाई भित्र्याइएको थियो । दीपाश्रीले ‘महनायक’का विषयमा आफ्नो अभिव्यक्ति दिँदा उनलाई दर्शकले गाली गरेका थिए । त्यसमा उनले पटक–पटक माफी पनि मागेकी थिइन् ।

धेरै सोच–विचार नगरी हतारमा निर्णय गर्ने उनको पुरानै बानी हो । पहिलो कारण ‘महानायक’बारेको विवादका कारण हुनसक्ने सम्भावित गाली । तर, यो मात्रै होइन,अर्को कारण पनि छ । र, त्यो हो, चलचित्र ‘छ माया छपक्कै’मा सुरुमा जितु नेपाल कलाकारका रुपमा थिएनन् । “कथामा मेरो रोल आएन भन्ने थियो । टिम मेम्बरका रुपमा मात्रै म बस्ने भन्ने थियो । तर, लेख्दा लेख्दै अचानक मेरो पनि रोल निस्किएपछि मैले गरेको हो,” उनी सम्झिन्छन्, “त्यसपछि म आफैँ केही गरौँ भन्ने सोचमा पुगेको थिएँ ।”

भेट हुन्छ तर कामका विषयमा कुरै हुँदैन ?
होलीको गीत रिलिज भएपछि काम विशेषले जितु दीपकको घरमै पुगेका थिए । केही घण्टा बसे । दीपकसँग गफगाफ भयो । तर, कामका विषयमा कुरा भएन । धार्मिक भ्रमणमा जितु, दीपक र दीपाले आफ्ना बुवा–आमालाई लिएर सँगै गएका थिए । तर, कामको विषयमा कुनै कुरा भएन । 

“भेट हुन्छ । तर, कामको कुरा हुँदैन । घरको कुरा भयो । अरु–अरु कुरा भयो । गीत निकालेको कुरा भयो । गीत आजकाल युट्युबमा हेर्नै छोडेछन् भन्नुभयो । मैले उहाँलाई हो,आजकाल युट्युबको भ्युज घटेको छ भनेँ,” उनी भन्छन्, “मैले पनि मलाई किन नबोलाको भनिनँ । उहाँले पनि मैले यसकारण नबोलाको भन्नुभएन । यो विषय मलाई पनि निकाल्न मन लाग्दैन । सायद, उहाँलाई पनि लाग्दैन होला । कुरै हुँदैन ।”

फोन पनि हुन्छ । गफगाफ पनि हुन्छ । भेटघाट पनि हुन्छ । केही समयअगाडिसँगै धार्मिक टुर पनि गरे । तर, कमेडी क्लब, आउँदो चलचित्र र सहकार्यबारेमा गफ हुँदैन ।

घोषणा नभइसके पनि ‘छक्का पञ्जा–४’ निर्माण हुँदै छ । दीपकराज गिरी लकडाउनअगाडि स्क्रिप्ट लेखिरहेका थिए । दीपक, दीपा, केदार घिमिरे र जितु बसेर त्यसलाई फाइनल टच दिने कुरा भइरहेको थियो । तर, लकडाउन सुरु भयो । उनीहरुको योजना अनिश्चितकालका लागि पछि धकेलियो ।

बन्ने ‘छक्का पञ्जा–४’मा दीपक–दीपाले बोलाउलान् भन्ने जितुलाई अपेक्षा छैन । “दीपा दिदीले जितुले विनासल्लाह एकलौटी निर्णय गर्दा हामीले पनि त्यस्तै निर्णय गर्न सक्छौँ भन्नुभएको छ,” जितु भन्छन्, “उहाँहरुले बोलाउनुपर्छ भन्ने छैन । तर, आजसम्म जे–जे भयो भयो । एउटा रोल छ, आऊ सँगै काम गर भन्नुभयो भने पनि ठिकै छ, म आउँछु काम गर्छु ।”
तर, ‘६ एकान छ’देखि ‘६ माया छपक्कै’सम्म आउँदाको टिम भने जितुले ‘मिस’ गर्नेछन् । उनले चलचित्रको काम नहुँदै त्यो महसुस गर्न थालिसकेको बताउँछन् ।

“हामी फिल्ममा मात्रै होइन, हरेक समय सँगै हुन्थ्यौँ । खाँदा, बस्दा, घुम्दा सँगै हुन्थ्यौँ । यतिसम्म कि फेसबुकमा केही लेख्दा पनि हामी सल्लाह गर्थ्यौँ । दीपक, दीपा, केदार र म रहेको यो ग्रुप मिस भइरहेको छ,” जितु नोस्टाल्जिक हुन्छन्, “तर, जे नहुनु थियो, त्यो भइसक्यो । दीपा दिदी र म यो घटनापछि पनि धेरैपटक भेटेका छौँ । सँगै रिबन काटेका छौँ । सँगै विज्ञापन पनि खेलेका छौँ । अरु सबै कुरा हुन्छ । तर, यही विषयमा केही कुरै हुँदैन ।”

स्क्रिप्ट नै फाइनल नभइसकेकाले अहिले नै सँगै काम गरिन्छ अथवा गरिँदैन यसै भन्न नसकिने दीपकराज बताउँछन् । “स्क्रिप्ट फाइनल भइसकेको छैन । चलचित्रमा मात्रै हामीले सँगै काम गरेको हो । अन्त हामी काम गर्न स्वतन्त्र छौँ । जितुले पनि टेलिभिजन तथा अन्य धेरै ठाउँमा सहकार्य गरेर काम गरिरहेकै छन् । दीपाजीसँग पनि काम गरिरहनुभएकै छ,” दीपक भन्छन्, “जितुलाई स्क्रिप्टमा रोल आयो भने दिने कि भन्ने कोणमा पनि हाम्रो कुरा भएको छ । हाम्रो सहकार्य चलचित्रमा मात्रै हो । त्यसैले अरु कुरामा त्यस्तो खासै केही छैन । चित्त दु:खाइ पनि त्यस्तो धेरै केही होइन ।”

अरु ब्यानरका चलचित्रमा नखेल्ने भद्र सहमति 
‘छक्का पञ्जा’ युनिटमा आबद्ध कलाकार चलचित्रसँग सम्बन्धित कुनै पनि काम गर्दा कुनमा गर्ने र कुनमा नगर्ने भन्ने विषयमा आपसमा छलफल गरेर मात्रै निर्णय गर्ने अनौपचारिक भद्र सहमति छ ।

दीपक–दीपाको समूहले आफ्नो चलचित्रमा काम गर्न थालेपछि उनीहरु दुईजनाले ‘शत्रुगते’मा काम गरेका थिए । अरुका ब्यानरमा काम नगर्ने भद्र सहमतिकै कारण जितु आफूले थुप्रै चलचित्रका अफरहरु अस्वीकार गरेको बताउँछन् ।

दीपकसँग जितुको पहिलो भेट दिनेश डिसीको ‘टाक्क टुक्क’मा भएको थियो । त्यसपछि उनीहरुले ‘संगालो’ र ‘काउकुती’मा पनि सँगै काम गरेका थिए ।

पछि दीपकले ‘तीतो सत्य’ सुरु गरे । जितुले ‘मुन्द्रे’ निर्माण गरे । विज्ञापनको साँघुरो बजार तर हास्य टेलिश्रृंखलाको बाढी आएपछि उनीहरु दुवै टेलिसिरियल बन्द गर्ने अवस्थामा पुगेका थिए । 

कार्यक्रममा रुकुम पुगेका बेला दीपकराज गिरी पनि सँगै थिए । दीपकले भने, ‘गुरु अब तीतो सत्य पनि बन्द हुन्छ । अब टेलिभिजनमा काम गरेर हुँदैन । फिल्म बनाउनुपर्छ ।’

त्यसपछि उनीहरुले संयुक्त रुपमा काम गरे, ‘६ एकान ६’मा । ‘वडा नम्बर ६’, ‘छक्का पञ्जा’ तथा यसका सिरिज र ‘६ माया छपक्कै’मा उनीहरुलेसँगै काम गरे । दीपाले ‘मुन्द्रेको कमेडी क्लब’मा अध्यक्षको भूमिका निर्वाह गरिन् । अन्ततः त्यही ‘मुन्द्रेको कमेडी क्लब’ नै सम्बन्धमा दरार आउने कारक बन्यो । 

जितुमात्रै होइन,बुद्धि र निर्मल दाइ पनि हुनुहुन्न 
छक्का पञ्जा मिडिया युट्युब च्यानल खोल्दै दीपाश्रीले ‘धनिया के होली’ बोलको गीत गाइन् । शब्द रचना पनि दीपा स्वयंको रहेको गीतको भिडियोमा दीपासँगै दीपकराज गिरी, केदार घिमिरे, शिवहरि पौडेललगायत चलचित्र ‘छक्का पञ्जा’ टिमका अधिकांश कलाकार छन् । ‘छक्का पञ्जा’ युनिटका अधिकांश कलाकार समेटिँदा जितुलाईकिन समावेश गरिएन?भन्ने जिज्ञासामा दीपाश्री भन्छिन्, “जितु मात्रै होइन, छक्का पञ्जामा हामीसँगै काम गरिरहेका बुद्धि, निर्मल दाइलगायत पनि हुनुहुन्न ।” 

Nepal Investment bank
Sunrise bank
Nepal Investment bank
Sunrise bank
बुधबार, चैत २५, २०७७ मा प्रकाशित
TATA Landing
TATA Landing
प्रतिक्रिया दिनुहोस्