काठमाडौं । कमलपोखरीमा बिहीबार ढलान राखिएपछि काठमाडौंका अभियन्ताले विरोध जनाएका छन् । अभियन्ता र स्थानीयहरु विद्यासुन्दर शाक्यविरुद्ध नाराबाजी गर्दै कमलपोखरी पुगेका थिए । उनीहरुले ढलानको फूल चाहिँदैन, कृतिम पोखरी चाहिँदैन, पर्यावरण मास्न पाइँदैन लगायतका नारा लगाउदै कमलपोखरी पुगेका थिए । उनीहरुले घनले ढलान फुटाउन सुरु गरे पछि प्रहरीले हस्तक्षेप गरेको थियो ।
“कमलपोखरीको आन्दोलन प्राकृतिकरुपको नै बनोस्, विकासको नाममा विनास नहोस् भनेर कयौँ दिन बितिसक्दा पनि ठेकेदार र महानगरले काम रोकेको छैन,” सर्वोच्चमा मुद्दा हाल्दा पनि काम नरोकिएको आक्रोस पोख्दै अभियन्ता आलोक तुलारले भने “प्रकृतिमैत्री पोखरी भएन भन्दा भन्दै सिमेन्टको फूल राख्न सुरु भयो । त्यहि भएर स्थानीयहरुले सिमेन्टको फुल भत्काएका हुन् ।”
कमलपोखरीमा प्राकृतिकरुपमा पानी जम्मा हुने भएकोले त्यसको दोहन गर्न नहुने अभियन्ताहरुको भनाइ छ । काठमाडौं महानगरका मेयरले चाहे भने कमलपोखरी जोगिने उनीहरु बताउँछन् ।