सीएनएन । पूर्वराष्ट्रपति डोनाल्ड ट्रम्प महाअभियोगसम्बन्धी मुद्दामा व्यस्त रहँदा पत्नी मेलानियाचाहिँ आफ्नो अधिकतम समय राजनीतिबाट मुक्त भई आराम गरेर बिताइरहेकी छन् ।
ट्रम्पविरुद्ध जारी 'ट्रायल'बारे जानकारी राखिरहेको भए पनि अमेरिकी पूर्वप्रथम महिला मेलानियाले यसप्रति एकदम कमस्तरको चासो देखाइरहेको सीएनएनलाई एक परिचित स्रोतले जानकारी दिएको छ । ट्रम्पभन्दा विपरीत उनले ह्वाइटहाउसलाई पूर्ण रूपमा पछाडि छाडिसकेकी छन् ।
पदमुक्त भएपछिको ट्रम्पको जीवनबारे सीएनएनसँग कुरा गरेका विभिन्न स्रोतहरुले बताएअनुसार मेलानियाको दैनिकी स्पाबाट भित्र–बाहिर गर्दागर्दै बित्ने गरेको छ । एक निकट व्यक्तिले भने, “उनी स्पा जान्छिन्, त्यसपछि खाजा खान्छिन् अनि फेरि स्पा जान्छिन् र बेलुकी ट्रम्पसँग डिनर गर्छिन् ।” फ्लोरिडास्थित पाम बिचमा रहेको आफ्नो घरमा उनी एकै किसिमका गतिविधिले दिन बताइरहेकी छन् ।
यसरी केही समयअगाडिसम्म अमेरिकाकी प्रथम महिला भए पनि ह्वाइटहाउसबाट बाहिरिसकेपछि उनको जीवनमा कुनै उल्लेख्य परिवर्तन आएको छैन । उनी अहिले प्रथम महिला हुनुभन्दा अगाडिकै जीवनशैली अपनाइरहेकी छन् । यसबारे उनले व्यक्तिगत प्रतिक्रिया दिनचाहिँ अस्वीकार गरिन् ।
ह्वाइटहाउस छाड्दै गर्दा मेलानियाको लोकप्रियता आधुनिक प्रथम महिलाहरुमा सबैभन्दा कम रहेको सर्वेक्षणले देखाएको थियो । जो कुनै समय ट्रम्प परिवारमा सबैभन्दा मन पराइएकी सदस्य थिइन् । विशेषगरी संसद् भवनमा भएको हिंसाबारे चुपचाप रहनुले पनि मेलानियाको छविमा प्रभाव पारेको बताइन्छ । घटनाको केही समयपछि मेलानियाका दुईजना स्टाफले त्यसको विरोध गर्दै पदबाट राजीनामा दिएका थिए । यसरी विभिन्न कारणवश ह्वाइटहाउसबाट उनी निराशाजनक स्थितिमा बाहिरिनुपर्यो ।
अर्कोतर्फ, पदभार ग्रहण गरेको एक हप्तामै उनकी उत्तराधिकारी जिल बाइडेनको लोकप्रियता भने आकाशिन पुग्इो । उनले र राष्ट्रपति जोए बाइडेनले थुप्रै ठूला म्यागजिनका लागि अन्र्तवार्ता दिई कभर पेजमा आएका थिए । प्रथम महिला भएदेखि जिल बाइडेनले कम्तीमा पनि सातवटा समारोहमा सहभागी भई सेनाका परिवार, क्यान्सरको रोकथाम, स्वास्थ्य सेवा, सामुदायिक कलेजको पढाइ र शिक्षकहरुको समर्थनजस्ता विषयमा वाचन गरिसकेकी छन् ।
तर, वासिङ्टन छाड्नुअघि मेलानिया भने तीन हप्तासम्म कतै देखा परेकी थिइनन् र पछिल्लो ६ हप्ता कुनै समारोहमा एक्लै सहभागी भइनन् । यससम्बन्धी उनको स्टाफले स्पष्टीकरण दिँदै उनी आमा र पत्नीको भूमिकामा बढी केन्द्रित रहेको बताएका थिए । चार वर्षको कार्यावधिभरि मेलानियाले कहिल्यै पनि राष्ट्रिय प्रकाशकलाई अन्तर्वार्ता दिइनन् । म्यागजिनको कभरमा उनले स्थान नपाएको कुराले मेलानियाभन्दा ट्रम्प धेरै रिसाएको पनि बताइएको थियो ।